Kaupapa: Health

Kua tohua tētahi wahine nō Taranaki hei waha mā ngā take HIV

Renee Kahukura Iosefa

E toru tekau miriona ngā tāngata puta noa i te ao e pākia ana e te mate whakaruhi ārai mate, arā HIV.  Kua tohua a Marama Pala, uri nō Taranaki, hei waha i tēnei take nui, mai i te tirohanga o te tangata whenua.

Neke atu i te rua rau ngā uri Māori ki Aotearoa nei kua pākia e te mate whakaruhi ārai mate, a, ko Marama Pala tētahi o rātou.

Heoi anō he hoa rangatira tō Marama, he tamariki tokorua anō āna tamariki, a, kō atu i te rua tekau tau ia e kōkiri ana i ngā kaupapa mō tēnei mate kia matāra mai te iwi whānui.

Hei tāna he hōnore nui te kawe i te take nei, ā ko tōna tino whainga inaianei he whakamana i te tangata whenua kia kawe i tēnei take nui puta noa i te ao.

E ai ki a Marama Pala, “Koinei tōku ao, tōku kaupapa he mea i whakahihiko i tōku wairua ki te kawe i ngā take HIV e pēhi nei i ngā iwi taketake o te ao.”

Hei ngā wiki e tū mai nei ka wehe atu a Marama ki te timata i āna haerenga nui o te tau hou ki te whenua o Amerika.