Kaupapa: Health

Kua tekau tau te whakataetae Orimipia e kori i ngā tinana o ngā kaumātua

Ko ngā whakataetae Orimipia mä ngā Kaumātua o te riu o Waikato i tā i te rā nei, i raro i ngā whakahaere a te rōpu kaitiaki kaumātua o Te Rauawaawa.  Koinei te tau tuangahuru o ēnei whakataetae, me te aha, ia tau, ia tau ka piki te rahi o ngā kapa pēperekōu ka karapinepine atu ki te whakanui i te karanga o te rā.

Nā te rōpu Kaumātua o Rauawaawa i Kirikiriroa, te karanga kia whakakotahi mai ngā kaumātua ki te whare tapere o Claudelands, i runga i te kaupapa hākinakina, hauora hoki.

Ahakoa kua hina ngā makawe, kua piko ngā tuarā, kua wepua e ngā hau o ngā tau ki muri, mārama ana te kite atu i te wairua whakataetae.

Tua atu i te whakakorikori i ngā tinana, kia whakapiki te hauora, kāre i kō atu i ēnei momo whakataetae whakahoahoa, hei tūtakitaki i te hunga kaumātua, kia whai hoa pūmau  anō hoki.

Otirā ehara ko te wikitōria te mea nui e whāia ana i konei, na reira ko wai i hua ko wai i toa? Ko te hunga kaumātua, ko te iwi Māori whānui.