Kaupapa: Teina Pora

Kua tau te tono whai kāpeneheihana a Teina Pora ki te Minita Tahū o te Ture

Kua tuku pānui ngā rōia o Teina Pora ki te Minita o te Tahū o Te Ture, ki a Amy Adams ka whai kapeneheihana rātou mo te “hē o te hāmene me te mauhere.” 

Kō atu i te rua tekau tau a Pora e noho mauhere ana mo te pāwhera me te kōhuru o Susan Burdett, i te Poutu o te rangi i tēnei tau i whakakorea e te Kaunihera Motuhake ā te Kuini aua hāmene, i whakaputahia hoki e ratou he taunaki kia kaua a ia e tū ano ki mua i te aroaro o te kōti mo taua hara.

Ko tā Amy Adams, na te whakaritenga o te Kaunihera Motuhake ā te Kuini  ka āta tirohia e te kāwanatanga ki te tono a Pora ki raro i ngā tikanga whakahaere o te whare paremata.

Ko tāna ano kei i a ia te tono a Teina Pora, na whai ano ka kōrero tahi ia me ētahi māngai o te ture ki te whakarite i te anga whakamua. Ka āta tirohia hoki aua māngai ki ngā kōrero katoa kia tāea e rātou te kite mēna ka whai mana tana tono. Whai muri i tēra ka tukuna te mana whakamutunga ki tētahi kaiwhakawā ō mua, kia kitea mēna ka taea e Pora te wawao, kare he hara tōna.

Ko tā Adams e hāere tonu ana tēnei take, inā e kore ia e tāea te whakaputa kōrero ano mō tēnei kaupapa.