Kua tangohia tētahi taonga i Te Papa Tongarewa

Kua tangohia tētahi tāonga e Peter Love i Te Papa Tongarewa, hei hokona atu ki tētahi whare taonga i Taranaki. He whā rau mano taara te wāriu o te tau ihu o tētahi waka e noho ana ki ngā ringa manaaki o Peter Love, ā, e ki a ia, kei a ia noa iho te mana whakahaere, ehara nō te iwi tēnā mana.

Nā tōna papa, a Wi Hapi Pakau Love, i rangahau nga whakapapa nei i te tau kotahi mano e iwa rau ono tekau mā tahi.

“Koinei pū te ngako o tō mātou whakapapa, ngā whānau, me ngā tātai whakapapa o Te Atiawa o Taranaki”

Ā, e ai ki a Peter Love i riro i tōnā Pāpā te mana whakahaere mō tēnei taonga hei utu i taua mahi.

Hei ko taana, “Nā runga anō i taua whakaaro, i whiwhi taku koroua i te tauihu waka nei”

Ko Wi Hapi Pakau tēnei, nōnā te mana whakahaere tuatahi o te waka, engari kua heke iho ki ngā ringaringa o Peter me tōna tūngane, a Michael.

Hei tā Peter e mea nei “I tonoa mai ahau e Te Papa Tongarewa kia whakahoungia anōtia te tuku. Taaku, kahore. I runga anō i taku whakapono me hoki atu tēnei taonga kāmehameha ki te wāhi e tika ai ka tahi, ka rua ki te kāinga tūturu o Wi Hapi Pakau”

Hēoi anō rā, ka noho te tauihu o te waka ki te whare hoko kairapu, ki a Dunbar Sloane i Tāmaki Makaurau. I tērā wiki i kite te taonga rā ki ngā rārangi hoko o taua

whare, engari auare ake.

“I te whai mōhioranga a Puke Ariki kia mōhio pū ai rātou kīhai au mō te hono atu anō rā kia rātou. Ehara i te mea ko te pūtea te aronga nui”

E ai ki te heamana o te tarahiti o Port Nicholson Settlement, ki a Neville Baker, he taonga nui tēnei ki ngā iwi o Taranaki Whānui, hēoi me tatari rātou kia āta whakaarohia he aha ngā mahi pai mō te hapū, iwi hoki.