Kaupapa: Shane Taurima

Kua rihaina te kaiwhakahaere o ngā hōtaka Māori, Pasifika hoki i Te Reo Tātaki

Te Kāea
Shane Taurima

Kua heke a Shane Taurima, kaipāpāho Māori, i tana tūranga Kaiwhakahaere o te Tari Māori, Pasifika hoki ki Te Reo Tātaki (TVNZ), nā ōna herenga ki te rōpū tōrangapū a Reipa.

E ai ki te pūrongo a 3 News, i whakatūhia  e Taurima tētahi hui ma Reipa, ki ngā tari o Te Reo Tātaki, i whakamahia ano ia ētahi o āna kaimahi ki te whakarite haere i taua kaupapa.

Kua whakaaetia katoatia te rihainatanga a Taurima e John Gillespie, te Tumuaki o te Tari Ranonga Kōrero.

I tērā tau, i whiua e Taurima tana ingoa ki te pōtae a Reipa kia whakataetae atu i te tūru o Te Ikaroa-Rāwhiti, heoi, nā Meka Whaitiri i kōwhiria hei kanohi mā Reipa, nāna ānō te tūru i kapo ake.

I taua wā, i heke a Taurima i tana tūranga, engari i hoki anō ia ki Te Reo Tātaki.

Kāore anō a Taurima kia kōrero mō tana rihainatanga, engari e ai ki ngā whakamāramatanga i puta i te pūrongo a 3 News, kua puta ia ki te whai i ōna wawata ki roto i te ao tōrangapū.