Kaupapa: Elections

Kua raru pea a Nāhinara nā ngā pōti motuhake

Aroha Treacher

Tūturu kua tau ngā pōti motuhake i tēnei wā, engari, ehara tērā i te whakatau i hiahiatia e Nāhinara, kua ngaro i a rātou tētahi tūru, nā reira, he ono tekau noa iho te rahi o ngā tūru Nāhinara ināianei, nā whai anō, tē tāea e rātou te whakahaere i te kāwanatanga me tō rātou kotahi.

Nā reira, kua riro taua tūru rā ki te Pāti Kākāriki, ā, kua whakarahi ake te nama o ō rātou mema pāremata ki te tekau mā whā.

Kei te harikoa te Pāti Māori nā te mea kua mana ngā tūru e rua, ā, ka tau tūturu te noho a Te Ururoa Flavell rāua ko Marama Fox ki pāremata.

Hei tā Te Ururoa Flavell, “He pai tonu ki a mātou tēnei momo, te kōrero whakamutunga mō Marama ka taea e mātou te whakariterite i ngā huarahi kei mua kei te aroaro.”

I te pō kōwhiringa matua i whiwhi i a Nāhinara te nuinga o ngā pōti, engari nā te ngarohanga o taua tūru ka whai hononga rātou ki Act, United Future me te Pāti Māori.  Otirā, ki te hiahia a Nāhinara ki te whakamana i ngā hanganga ture me aro rātou ki ōna hoa.

Hei te ahiahi o āpōpō, kua whakaritea te waitohu kirimana i waenga i te Pāti Māori me Nāhinara.