Ngā kaupapa: Crime, Prison

Kua rāhutia tā te tangata mauhere pupuri i ngā taonga pounamu

Kua karangatia e te Pāti Māori tētahi hui me te Minita Ara Poutama Aotearoa, ao ake i te whakatau ka rahuitia tā te tangata mauhere pupuri i ngā taonga pounamu me ngā taonga manaia.

E ai ki a Ara Poutama Aotearoa he mōrearea nui tō ēnei taonga i ngā whare herehere, āpiti atu, he taonga mana nui kāore e tika ana ki taua wāhi rā.

He mauhere o mua a Shane White kua roa e mahi tahi ana inaianei me te hunga kei rō whare herehere tonu. Kei te pāpouri ia ki te whakatau a Ara Poutama Aotearoa kia rāhuitia ngā taonga pounamu, manaia hoki. 

Hei ta Ara Poutama Aotearoa, he mōrearea ngā taonga, ā, ka whakamahia pea hei mea hokohoko, ka mutu ka whakawetihia pea te tangata mo tana taonga.

E ai ki te Pāti Māori kei te pīrangi rātou ki te kite i ngā kōrero taunaki i tēnei whakatau. Ka mutu kua whakapā atu rātou ki te tari o te Minita, o Sam Lotu-Iiga.

E ai anō ki a Ara Poutama Aotearoa, he tohu te pounamu kua wātea te tangata i ngā here, ā ko te tikanga he mea tuku ki te tangata whai mana. Nōreira, hei tā rātou ehara te whare herehere i te wāhi tika mōna.

Ko te kaumatua, ko Bob Clarke, tētahi ka noho ki te paepae i ngā pōhiri o te whare herehere wahine a rohe o Tāmaki Makaurau. Kaore ia i te whakaae ki tēnā whakaaro. 

Kāti mo te hunga kei rō whare herehere kē, ka puritia tonutia  e rātou a rātou taonga. Heoi, hei te Mane, ko te hunga tauhou ka rāhutia.