Kaupapa: Kōhanga Reo

Kua puta te whakatau a te Kōti Teitei mo te tohe a Toni Waho ki te Poari Matua o te Kōhanga Reo

Kātahi anō ka puta te whakatau a te kaiwhakawā i te Kōti Teitei ki Te Whanganui-a-Tara mō te tohe a Toni Waho, tētahi o ngā mema o te poari matua o te Kōhanga Reo, ki te Poari Matua tonu, āpiti atu ki te heamana, Tina Olsen-Ratana. 

Kua whakahēngia e te kaiwhakawa te tono a Toni Waho, ko te tono rā kia aukatihia e te kōti tētahi hui motuhake a te poari hei whakamana i tana panaiatanga atu i te poari.

E ai ki te kaiwhakawā kaore ia i te whakaae e whai kiko ana te wero a Toni Waho, āpiti atu, kaore ia i te whakaae ko wā Toni Waho whakapae mo ngā mahi a te Poari me Tina Olsen-Ratana i te take hei whakawā mā te kōti.

Nōreira ki ta te kaiwhakawā kaore ia i te kite i tētahi tūāpapa e taea ai te kōti te uru atu ki ngā take o te Poari.

Hei tā Toni Waho, “Kei te pouri ahau, kāre au i te koa. Heoi ano kei te ū tonu ahau, e whakapono tonu ana ahau i tika tāku i mahi ai ki te whakamōhio atu ki ngā minita. Kei te hoki ahau ki aku kaitautoko, ana, kei te āta whiriwhiri mātou ka pēhea a muri ake nei. Kei te aro hoki ahau ki ngā huarahi kei roto i te ture, ara, i te huarahi o ngā kōti. Ā, kei te aro hoki ahau ki ngā huarahi i waho o te kōti. E whakapono ana ahau, e taea ana ahau te mahi tahi i te poari. Ko te aro ki ngā whakapae kare anō kia tūhuratia me āta aro e mātou.”

I rongo i roto i ana kōrero ko ngā kōrero e hāngai ana ki ngā whakapae, ko ngā whakapae raweke pūtea ēra, he whakapae e mea ana e Toni Waho i puta mai i a Rakai Tawhiwhirangi, te tama a Irirangi Tawhiwhirangi, a he whakapae raweke pūtea. Hei tāna he waru whārangi te roa o ngā whakapae, he whakapae taumaha e hāngai ana ki te Poari Matua me Te Pātaka Ōhanga. Hei tā Toni Waho kāre anō kia āta tūhuratia tae rawa ki tēnei rā. Nā kei te whakahē tēra e te Poari Matua o te Kōhanga Reo.

Katoa ēna whakapae i tukuna e Toni Waho ki ngā Minita, ki a Hekia Parata rāua ko Pita Sharples, nawai rā e mōhiotia ana i karangatia te tari hara tāwere.

Ā, ahakoa i kite Te Tari Hara Tāware kaore i hara, kaore he hara a ture nei i Te Pātaka Ōhanga, i kite rātou i hapa āna mahi whakahaere.

Heoi e ai ki te Poari Matua nā tēna mahi a Toni Waho i raru ai rātou, i takahitia tō rātou mana, nāwai rā ka aro ake rātou ki te pana i a Toni Waho mai i tana tūranga mema poari.