Kua puta te tono ki te whakapakari i ngā kaupapa whakaora i te Kiwi

Renee Kahukura Iosefa

Ahakoa ngā kaupapa e whakahaere ana puta noa i Aotearoa ki te whakaora ake i te oranga o te manu Kiwi, e ai ki ngā kitenga rangahau o Tākuta Marie Brown Kaitaari Kaupapa o te Manatōpū o Environment Defence e ngaro haere tonu ana te oranga o te Kiwi.

Hei tāna, mā te mahi ngātahi o ngā ratonga tiaki taiao o te kāwanatanga me ngā kaupapa kaitiaki o te iwi Māori he huarahi oranga kia āwhina ki te pīkau i te mahi kia ora ai te Kiwi.

Mā wai te manu kiwi e āwhina, e tiaki kia whai oranga ia i roto i tōna ake taiao.  Nei rā te kitenga i te rangahau a Tākuta Marie Brown.

Kua ruku a Brown i te noho o te kiwi.  Hei tāna, ahakoa te whānui o ngā momo kaupapa e whakahaeretia ana hei whakarauora i te Kiwi kei te ngau kinotia tonutia tōna oranga.

Heoi ko te tino whāinga o āna mahi rangahau ki te āta whakairo he ara whakamua.  Hei tāna mā te mahi ngātahi a ngā ratonga taiao o te kāwanatanga me te iwi Māori i raro i nga kaupapa kaitiaki taiao he hua oranga ka kitea mō te kiwi.

Hei te marama o Paengawhāwhā, ka puta ai āna kitenga ki roto i tōna pukapuka, ko Vanishing Nature.