Kaupapa: Kōhanga Reo

Kua puta te tohu ki te Poari Matua o te Kōhanga Reo ki te whakatika i a rātou mahi

E hia marama nei Te Poari Matua e whakaroaroa ana, heoi, no te takiritanga o te wepu a te Minita, tūturu kua hohoro tā te poari whakatika i tana whare.

Koinei te karere i tukuna ki nga kohanga o te motu i te rangi nei, e ai ki te poari ka kotahi atu ia ki te whakarite hanganga hou, mō te ao hou. 

E ai ki a Toby Curtis, tetahi ringaraupa i te ao Matauranga Māori, koia te ara tika.

“I te mea kei te whai ra rātou i tēnei huarahi ki au ka tutuki pea te nuinga o nga mamae kei tena whanau, kei tena hapu, kei tena iwi.”

E ai ki te poari, ko tona hanganga me te waahi ki ona mema tera ka arongia i te hui ki Turangawaewae a tera marama. He hui i karangatia e Kingi Tuheitia, ao ake i ngā nawe i whakapuakitia e te kaahui Kōhanga reo o Mataatua/Tauranga Moana.

E ai ki te kawenata o te poari matua, kei te poari ano te mana tohu i ana mema, ā, nareira te mea ake a te hunga whakahē kua kore whai reo ngā Kōhanga o te motu ki ngā whakahaere.

Tuturu i tua atu i te mana tohu mema ki te poari, i raro hoki i te kawenata e meatia ana ka puritia e ngā mema o ratou turanga ā mate noa.

I roto i tēnei hui a te Manatu Matauranga, ko tetahi o ngā mema o Te Poari Matua o te kohanga reo ara ko kahurangi Iritana Tawhiwhirangi. I kōrero tahi maua mō te wā poto, ā, hei tana kei te uu te poari ki te kaupapa o te kohanga reo engari karekau ia mō te kōrero a uiui nei ki au.

Kaati, katoa ena take e kore e kore ka arotakengia i te hui e hāere ake nei me te wawata ka puta he maramatanga.