Kaupapa: Kōhanga Reo

Kua puta ngā whakaaro mō ngā whakapaunga moni i te Pātaka Ōhanga

Takariri ana, ohorere ana, ā, arohanui ana ki ngā tamariki mokopuna, ki te reo me ōna tikanga.

Koinei ngā momo āhua i puea ake i te ao Māori i te rangi nei, mō ngā whakapaunga moni i te Pātaka Ōhanga.

He tohunga o te ao pāpāho, he mātanga o te ao mātauranga Māori, he kaumātua nō te Kōhanga Reo.

Koia nei te hunga i whai wāhi ake ki te whakapuaki mai i o rātou nei whakaaro mō te raru hōu kua puea ake i roto i ngā rangahau o te Tari Matua o ngā Kōhanga Reo.

Kāre i ōrite ngā whakaaro, me te aha, ko te wairua hīkaka i puta, ko te ngākau mahaki i kitea, ko te takariri i puta, otira, ko te arohanui i rongohia i roto i ngā reo me te wero kia tere te whakatika i te whare, mō te kaupapa, mō ngā mokopuna, mō te reo te take.

Heoi ko te mea pōuri kē, ka mamae ko te tokomaha, nā ngā mahi hē a te tokoiti.

E ai ki ētahi o ngā kōhanga reo o Tāmaki i te rā nei ki a Te Kāea, ko tā rātou e aronui nei, kia kaua e whakararua ngā whakahaere o tēnā kōhanga, o tēnā kōhanga, ā, kia pūmau tonu te aro ki te oranga o ngā tamariki mokopuna me o rātou whānau.