Ngā kaupapa: Kapa Haka, Te Matatini

Kua puta ngā mahi kapa haka hei whiringa pāpāho whai utu

Wepiha Te Kanawa

Me utu ngā hemonga kapa haka e noho ana i waho ake o Aotearoa me Ahitereiria mēnā e pīrangi ana rātou ki te mātakitaki i Te Matatini i tēnei tau, kua whakaputa a Aotearoa Kapa Haka Limited i tētahi whiringa utu mō ngā rā e whā, neke atu i te whā tekau tāra (NZ$) te wāriu.

Ko Willie Te Aho te kaihanga o tētahi kaupapa e kawea ai te kapa haka ki tarāwāhi.

E ai ki a Te Aho nō Aotearoa Kapa Haka Limited, “Mā te ipurangi ka pēhia te pātene, ka pātaingia pīangi koe ki te utu i ngā nama mō tēnei mahi, ā, ka whakaae te tangata, $10 te utu ā-Amerikana nei mō te mātakitaki i te rā kotahi, nō reira koira te utu mō te mātakitaki i roto i ngā motu kei waho atu i a Aotearoa me Ahitereiria.”

He kaupapa i tīmata ake i tērā tau ki ngā whakataetae kapa haka ā-motu mō ngā kura tuarua.

Heoi ka whai wāhi ngā whānau o Aotearoa me Ahitereiria ki te mātakitaki i te mura o te ahi.

Hei tā Haunui Royal nō Whakaata Māori, “Ko ngā hōtaka ki te rā tuatahi ki te rā toru i runga i te teihana Te Reo, ko te rā whakamutunga kei runga i te teihana Māori. Ko Te Matatini katoa ki runga i te ipurangi o maoritelevision.com, kei Aotearoa noa iho me Ahitereiria.”

Engari mō tēnei kaihaka ā-motu ō-mua, a Lewis Whaitiri e noho ana ki Rānana, ko te whakahono atu ki tana ahurea e kore e ea i te moni.

Hei tāna, “Kātahi anō mātou ka kite me utu he tekau tāra mō ia rā, i āhua ohorere i te tuatahi, heoi anō nā runga i ngā āhuatanga o te ao pākihi, kāre he aha, me utu ka tika hei tautoko i te kaupapa o Te Matatini, i ngā pāhiki Māori anō hoki, waihoki ka āhua whakakotahi mātou i a mātou anō e noho nei ki Rānana.”

Neke atu i te kotahi marama ka tū a Te Matatini, tāria te wā ka kite mēnā rānei ka angitū tēnei kaupapa hōu.