Kaupapa: Mining

Kua puta ano te karanga a ngā Kākāriki ki te whai i ngā kaupapa pūngao e tiaki ana i te taiao

Kua piki ake ngā raru mōrearea i roto i ngā mahi keri kohuke, keri kōhinu ki Aotearoa nei. Ko tā te kaikorero mo ngā take pūngao o te rōpu Kakāriki ko tā Gareth Hughes, me whāki atu aua raru katoa ki te iwi whānui o Aotearoa, kā tika.  

I tērā marama i whakawāteahia e te kāwanatanga te 429,298 kiromita tapawhā ki ngā moana o Taranaki, Te Tai Tokerau meTe Waipounamu hei wāhi tirotiro hāere mo te penehīni.

Ko tā Gareth Hughes, e ai ki ngā tatauranga o WorkSafe NZ i whakamakeretia e te kamupene hinu o Anadarko tētahi whārangi, he whā tana te taumaha ki raro i te moana i ā rātou e kerikeri kohinu ana ki Waitaha i tērā tau.

Ko ētahi atu raru i puta e ai ki a WorkSafe he ahi, he turuturu korohū, he maringi hinu hoki.

I te hui Penehīni i tu ki Tāmaki i tērā marama ko tā te Minita o ngā take pūngao ko tā Simon Bridges he nui ngā hua ka puta i ngā mahi keri kōhuke mo Aotearoa. E hia rau miriona tāra ka hoki ki te karauna ia tau. Hei tāna ko Taranaki anake te wāhi kei Aotearoa e kaha mahi ana i aua mahi, heoi ko tāna me whakarahi ake ngā wāhi ki te tekau mā whitu.

Heoi ki ta te rōpu Kākāriki he nui ake ngā raru taiao mo tēnei whenua i ngā hua ka hoki ki Aotearoa, ko ngā tatauranga kua puta mai i a WorkSafe he tohu o taua ahuatanga.

Ki tā Gareth Hughes, ahakoa kei te kaha te kāwanatanga ki te whakanui i ēnei mahi ki konei, kei te hē katoa a rātou kōrero mēna kei te ngaro ngaro hāere aua kamupene nui i ā rātou taputapu ki raro i te moana.  

Hei tāna he kaupapa whai moni anake tēnei, i te mutunga ake ko te taiao, ko te moana ko te whenua te utu, mēna e anga whakamua tonu ana te mahi keri keri ki Aotearoa nei.