Kaupapa: Api Mahuika

Kua pohara katoa te iwi Māori i te ngarohanga atu o Tākuta Apirana Mahuika

Rahia Timutimu

E auau ana te puta o ngā tangi aroha i ngā iwi o te motu ki tētahi rangatira i te ao Māori, he kaiako, he Minita o te Hāhi Mihingare, he tōtara haemata o Ngāti Porou.

Nō te ata nei, ka hinga a Tākuta Apirana Mahuika i tōna kāinga i Kaiti, i Tūranganui-a-Kiwa.  He toki tē tangatanga ōna paihere i te rā, i mōhiotia ai e te tini, ko Pāpā Api.

I tae mai te pae mate nō ngā tōpito katoa o te motu, ki te poroporoāki i te rangatira o Ngāti Porou, a Tākuta Apirana Mahuika.

Hei tā te kaikōrero o te whānau, a Willie Te Aho, “Ahakoa he paki te rā i roto, rere ana ngā roimata, ahakoa kua roa e māuiui a ia, engari tēnei rā tonu kei te whakahoki ki Tikitiki, ki reira takoto ai, tae rawa ki te Taite.”

Kei tēnā, kei tēnā ōna ake pūmahara mō Tākuta Apirana, i mōhiotia whānuitia ki te hunga pātata ki aia, ko "Uncle Api" ko "Pāpā Api" rānei.

Ki tā Selwyn Herewini, “Me pēnei te kōrero, kua ngaro tō mātau ūpoko ariki o Ngāti Porou, kei te tangi te maunga tapu o Hikurangi, Waiapu.”

I hiakai a Pāpā Api ki ngā mahi i whai hua ki te iwi Māori. Nā tēnei e whā ngā wā i tuku te hiahia kia whai ia i te taitara "Tā" heoi i whakapekaina aua tono, nā tōna kāre e hiahia kia whai hōnore i āna mahi.

Ahakoa āna ekenga ā mahi, i pupuri tonu ia ki ngā mahi ā whānau, i reira rātou i tōna hā whakamutunga ki tōna kainga ki Kaiti, Turanganui a Kiwa. E ora tonu ana ia i tōna hoa a Karin, me āna tama tokorua a Matanuku raua ko Hamana, me āna mokopuna.

Hei tā Herewini, “Ko tā mātau hei whakatutuki i ngā kaupapa i wawatahia e ia, ko ngā kaupapa nāna i kōkiri, koira tā mātau e whai nei.”

I tēnei ahiahi haria ai a Tākatu Apirana ki te whare tangihanga a Evans, ā, tāria te wā ka mau tana tūpāpaku ki Te Rahui Marae, ki Tikitiki ki Te Tairāwhiti.  Ki reira ia takoto ai tae rawa ki tana nehunga hei te Rāpare, ki te urupā o tana whānau ki Kaitaha.