Kaupapa: Arts

Kua kaha ake te hononga o Aotearoa ki te Czech Republic nā te whakaaturanga a Lindauer

Dean Nathan

Kua kaha ake te hononga o te iwi kei te Czech Republic kia tātou o Aotearoa nō te kawenga o te kaitā rongonui a Gottfried Lindauer me ana mahi ki reira whakaatuhia ai.  

Kua tae ki te rā whakamutunga o te ope o Aotearoa ki Pilsen i te whenua Czech Republic.  Nāreira kahore he mahi mā rātou i tēnei rā i tū atu i te arahi haere i te tangata whenua ki waenganui i ngā tūpuna e iri ana ki ngā patu o tēnei whare.

Ko te kahu kiwi o Eru Tamaikoha Te Ariari o Ngāi Tūhoe te aronga o tēnei ope e arahi mai ana e tana mokopuna.

Hei tā Ngahiraka Mason, “Kei te koa te ngākau.  Ā, kua kite au i ngā tāngata whenua o Pilsen e ngākaunui ana ki ngā mahi a Lindauer otira kia tātou te iwi Māori.”

Anō nei i te kainga kē te ope o Aotearoa i te kaha manāki mai o te tangata whenua.

E ai ki a Patu Hohepa, “Kei konei katoa huri atu ki titiro kia rātou ka mōhio kei tu atu i a rātou he tūpuna engari ki te wā tata kia tātou ko o rātou nei mokopuna tamariki ko tātou ēnei.”

He iwi tino Māori nei ngākau humaria, kaitahi kōrerotahi.  Kua kaha ake te hononga o te iwi o Czech Republic kia tātou i te kawenga mai o Gottfried Lindauer me ana mahi tā ki tōnā kainga tupu.

Ki tā Ngahiraka Mason, “He iwi pai tēnei he iwi pai ka tiaki rātou i ngā mahi a Lindauer aa ka waiho rātou ki konei me te mōhio ka manākihia.”