Kua hono tahi te Pāti Mana me te Pāti Ipurangi

"Ipurangi Mana", koia te ingoa hōu a te rōpū Mana me te Pāti Ipurangi, i waitohu i tana hono tahi i te Whare Pāremata i te rangi nei

Hei tā Hone Harawira, "Ehara a Hone Heke i te tuakana engari he rangatira tonu i roto i tēnei ao. Ehara i te mea, maku tenei maku tena." 

Tuturu ko Hone Harawira te tuakana otira te kaiarahi o te Pāti hou, waihoki te upoko o te rārangi. 

Tuarua ko te kaiārahi o te Pāti Ipurangi ka whakahuatia hei tēnei Rapare. Katahi ko Annette Sykes me John Minto, na ka rua ngā mema Ipurangi, ā, mai reira ka taūtūtu te noho. 

E ai ki te perehetini o te Pāti Ipurangi ki a Vikram Kumar, ka nui ake te pūtea ka whakatōpungia e rātou - engari tuturu kei a Mana ngā tāngata i runga i te papa me ngā mohioranga ki tēnei tū mahi. 

Ko te whainga matua mō Ipurangi Mana he turaki i te kawanatanga o Nahinara - he take tokatū moana - na reira i rapa ki ta raua whakāetanga.

Heoi, ko te whakahoki a Nahinara, he ara noa tēnei e karo ai a Kim Dotcom i tana pananga i Aotearoa, ā na reira tana pūtea tautoko koata miriona tāra. 

Kāti e ai ki te Pāti Māori kua toka inaianei tana kōrero koia anake te reo Māori motuhake i te Whare Paremata.

Mēna ka raru te honotanga ki wāenga i ngā Pāti nei ka tāea e Mana te whakakore i te hononga, e whitu ngā ra noaiho te roanga whakamohio mēna e hiahia ana a Mana ki te whai i taua huarahi. Tu ātu i tēra he wāhanga o roto i te whakaaetanga kia āta arotakehia e ngā rōpu ngā hua o taua hononga e ono wiki i muri i te kōwhiringa pōti whānui.