Kaupapa: Nelson Mandela

Kua hinga a Tā Nelson Mandela

Ko te kuru o te marama kua mōnenehu ki te pae, ko te ringa kori o aituā kua hao ake anō ki te tapouroa o Hinenuitepō.

I te ata nei, hinga atu ai he kōtuku rerenga tahi, ko Nelson Mandela, e iwa tekau mā rima tau te pakeke, kua riro nei.

Ko te hunga whai wāhi atu ki ngā hua o āna whakapaunga kaha i a ia e ora ana, kei te takiwā o ngā tini miriona.

I tohua a Nelson Mandela hei Perehitini Mangumangu tuatahi o tētahi o ngā whenua kaikiri rawa atu o te ao, ko ia te kaiurungi i te waka o mana ōrite, o mana motuhake, i te wā i whakahaerehia tōna whenua e te rōpū tōrangapū Nāhinara, me tā rātou kaupapa Apartheid.

I whānau mai, ā, i tipu ake a Nelson Mandela i waenganui i tōna hapū i tētahi pā i te taha tonga o Awherika ki te Tonga, ko tōna ingoa i tōna whānautanga, i tapaina e tōna matua, ko Rolihlahla.

Ka haere te wā ka whakaurutia ia e ōna kauheke ki tētahi kura Pākehā ako ai, ko tōna kaiako matua tērā i tapaina i a ia ki te ingoa Nelson.

I te matena o tōna pāpā, ka tonoa ia ki te rangatira o te iwi Thembu, noho ai, ako ai.  

Heoi ko taua whakatipuranga i whakatō i ngā pūmanawa o te rangatira ki roto i a ia.

Ko te mutunga o tōna whakatupuranga ki roto i te iwi Thembu, me tā rātou tono i a ia ki te whare wānanga hei whai i te tohu ture, te take i whai hua ai tōna hunukutanga ki te taone nui noho ai, me te tīmatanga o tana whai i te ara o pahoro mō te mana motuhake o tōna iwi taketake, te mana whenua o Awherika ki te Tonga.

Ko āna mahi e waha ana i te reo hinapōuri o te iwi taketake, me te porotū i te ture Apartheid i raro i te maru o te rōpū African National Congress, te matua o ngā take i mauheretia a ia e te Kāwanatanga mō ngā tau 27.

Nā ēnei momo porotū, nā te kaha o te iwi taketake me ngā momo kaitautoko hōrapa i te ao, i tukuna a Nelson Mandela i tōna mauheretanga.

E toru tau whai muri mai, i te wā i whakaaetia te mana pōti o ngā uri mangumangu mō te wā tuatahi, ka pōtihia a ia hei perehitini o te whenua o Awherika ki te Tonga, ā, mai i taua wā tae rawa mai ki tēnei rā, ko ia tērā te tino o ngā tauira ki ōna uri mangumangu, otira ki te ao whānui, o tēnei mea te mana ōrite o te tangata.