Kua eke ngā kaiwhakataetae ki te pae o NZIFBB - Pūrongo Motuhake

Tamati Tiananga

Ko te tākaro whakawhena uaua he tākaro whakaine uaua, he tākaro hangarite uaua, he tākaro ōwehenga uauau hoki.

Mō te tangata, he tākaro whakatipu uaua ki a pākaua te tinana ka mutu, e hia kē nei ngā haora e whakaheke tōhau ana te tangata e hiki maitai ana i te whare oranga.

He uaua tenei tākaro mā ngā tāngata ki te whakatutuki, otira mā te hiringa me te ūpoko pakaru ka taea.

Ko ngā toa no ngā whakataetae ā-rohe e whitu ka puta ki te mura o te ahi o te taumahekeheke matua NZIFBB, ko te hunga ka toa haere ki te whakataetae Arnold Classic.

E rikarika ana te hunga whakawhena uauau, ko tā Tiare Tawera (Tūhoe), arā noa atu ngā aupikinga me ngā auhekenga i a ia e takahia ana te ara ki te taumata, he kaupapa i tīmata he rima tau ki muri nei.

I te rua mano tekau i hua ake ko tenei hai mahi mō tana oranga, ko te ihu manea taiohi nei o te hōtaka whakahirahira rawa reo Māori o Pūkana te whakatau irangata mō te hunga mātātāhi, engari na tana kore whai i ngā mahi hauora ka puta te whakatau ki te whai i te ao whakapakari tinana kia tū hei tauira mō tana tamahine a Owairea Tawera.

Ka hoki mahara a Tiare ki te tau rua mano ngahuru mā tahi i te huinga whakataetae NABBA, he tuarua tana turanga i te whakataetae a rohe mō te wahanga tauhou mō te reanga whitu tekau kiro karamu, he tuarua hoki i te whakataetae ā-motu.

E ai ki ngā kaiwhakawhena uaua whai utu nō te whānau O'Malley a Teina rāua ko Kenny mā te ako i o rātou koretau e angitū ai te tangata.  

I mua he tākaro tēnei mā te hunga tāne noa, engari ināianei kua whai wāhi atu ngā wāhine, ko tētahi o ngā wāhanga ko te bikini.

Otirā mō te hunga i toa, ko te mahi he whakawharite mō te taumahekeheke Arnold Classic ki Ahitereria a tērā tau.