Kōrerotia te whenua i tēnei te wā mō te whakakotahitanga – Jamie Tuuta

Heta Gardiner

E ai ki a Jamie Tuuta o Te Tumu Paeroa, he maha ngā whenua Māori e noho puehu ana nā te ruarua o ngā uri e hokihoki atu ana. Ko tāna me aro te Māori ki ōna whenua i tēnei wā o te tau, i runga i te mōhio ka whakakotahi ai ngā whānau mō te wā hararei.

He āhuatanga e whai wāhi nui ana ki te ao Māori te manaaki i te whenua. Ēngari te toro atu ki o ake whenua, e ai ki a Te Tumu Paeroa, e hanga pōhara ana.

Hei tā Jamie Tuuta, “Ko te nuinga o ngā whenua kei te tiaki nei mātau, ko te nuinga o ngā tāngata nō rātau aua whenua, kaore anō rātau kia kite, kia rongo, kia pā ki o rātau whenua.”

Nōreira kua huri a Te Tumu Paeroa ki ngā hangarau hōu o te wā, ki te whakaratarata e te marea me te rangatahi ki te whakaaro nui ki te whenua.

Ko tā Tuuta, “Kei te mōhio tātau he rerekē tēnei reanga tēnei reanga rangatahi. He rerekē tō rātau tirohanga ki te ao. Te ao hurihuri nei, tatū atu ki tō rātau ao Māori.”

Tuia ki tērā ko tā Tuuta, ko tēnei te wā o te tau ki te aro ki ēnei āhuatanga.

“Te wā e huihui nei ngā whānau, ngā mātua ngā koroheke, ngā kuia me ngā rangatahi,” tā Tuuta.

He āwangawanga nui te korenga o te aro o ngāi Māori ki ēnei take.

Hei tā Tuuta, “Kei reira te hunga e tino ngākau nui ana ki tēnei kaupapa, ki o rātau whenua. Kua kite i te hihikotanga o te ngākau o tērā hunga....ēngari he tokoiti noiho.”

“Ki te kore te ao Māori e aro ki tōna whenua, ka pēhea? Ka pēhea?”

He āhuatanga hei matapae mā te marea i te huringa o te tau hōu.