Ko te kāinga o tētahi whānau te utu ki tētahi kamupene tuku pūtea tārewa

Heeni Brown

Kua tonoa tētahi whānau o Taranaki kia puta i tō rātou kāinga i Ōtakeho, he korenga nō rātou e whakaea i te mōkete kua tekau tau e iri ana ki runga i tō rātou whare. Hēi tā te whānau kua mahue mai ki a rātou he nama nui, ā, kua riro ko tō rātou whare hei papa.

Kei ētahi whakaahua kitea ai te mana tukuiho o te whanau ki ta rātou whare, inaianei e mautohengia ana.

I ngā tau rua mano ka tono pūtea atu rāua i te kaiwhakarite mōkete i a Miles McKelvy, me te aha, ka tukuna hoki ki a ia te mana mō tō rāua whare.

Hei tā te tokorua rā kihai te moni i whakawhiwhia, ā, nāwai ka hāmenehia te kaiwhakarite mōkete rā e te ture, heoi i te otinga ake i mahue mai he nama nui hei utu mā te whānau Pine, ā, nō muri, nō te tau rua mano mā whā ka tono pūtea rāua i te ohu o ASL Mortgages hei poitō whakarewa mō tō rāua kāinga.

Hei tā John rāua ko Rubina kua utua kētia te nama a ASL Mortgages, heoi e tāria tonutia ana ngā whakamārama i te kamupene pūtea taurewa mō te nui o te nama e iri tonu ana, hei whakaea mā rāua.

Nō te Rātū i tēnei wiki ka tae ake tētahi hēteri ki te matakitaki iho i tō rātou whare, heoi nō te taenga ake i te rangi nei, ka whakarere ake ia. I tae anō he tono pana ki te whānau i a ASL Mortgages, me te whakamōhio ake kei te whakaritea he hokohoko mō te whare.

I whakapā atu a Te Kāea ki a ASL mortgages limited hei tā ratou ki a Te Kāea me whakapā atu ki o ratou roia ki a Harkness Henry Lawyers, na ratou tonu te reta e whakatauhia ana me whakarerea a John rāua ko Rubina i ta rāua kainga.

Tokoiwa ngā mokopuna o te tokorua, ā, ka pakanga tonu rāua kua whitawhita tonu ai te ahi kā mō rātou te painga.