Kia whāi reo Māori ki te ipurangi, koia tā E-Tangata

Te Kuru o te Marama Dewes

Ahakoa kei te pari o te rua, kei te whakanui te pae tukutuku pāpāho o E-Tangata i te tautoko a ōna kai pānui kia ora tonu ai, engari kāre anō kia whakamāui ake. Hei tā te heamana a Stacey Morrison he mea nui kia rangona ngā whakaaro Māori i ngā pae pāho.

Kia whānui, kia hōhonu, kia Māori te titiro ki ngā take o te wā, i roto i ngā mahi pāpāho ā-ipurangi, koia tā E-Tangata.

“Ahakoa te maha o ngā momo tuhinga ka āhua papaku te ruku i ngā mātauranga, me whai wāhi hoki ngā tuhingaroa ngā tuhinga whai kounga koina te wawata,” te kī a Morrison.

Ko tā E-Tangata he pāoho i ngā tuhinga Māori, Pasifika anō hoki. Hei tā Stacey Morrison, kei warea e ngā whakaaro auraki.

“Me motuhake te tū a E-Tangata i waho tonu i ērā momo wāhi ipurangi kia mana ai te reo o tātau kia mana ai te reo o ngā whanaunga o te Moana Nui ā Kiwa,” te kī a Morrison.

Kua toru tau a E-Tangata e anga ana i runga i te koha a Tindall Foundation, heoi ināianei kua mimiti haere ērā moni. Nārā he kaupapa kohi moni ā-ipurangi nā E-Tangata i whakarewa, me te aha, neke atu i te whā mano kua tukuna atu ki a rātau e te hunga e hīkaka tonu ana ki te pānui i ngā kōrero.

Ko tā Morrsion, “Engari me kaua pea e whakamā nā te mea koina tētahi āhuatanga o te wā. Ko Huffington Post ka pēnā, ko NBR ka pēnā, koina te āhuatanga o te ao hangarau, otirā o te ao pāpāho ā-ipurangi.”

Hei tā Stacey Morrison nā te whanaketanga o te ao pāpāho, me whai reo ngā mātanga whao i te whakaaro Māori ki ngā pae tukutuku.

“Me mātua whai kōunga, whai hāngai ki te kaupapa, he pūkenga anō tēnā. Me uaua ka kite i ngā wāhi e whakakoi ai te tangata i ōna pūkenga tuhi pēnā,” te kī a Morrison.

Kei te rapa moni tonu a E-Tangata i a rātau e whakarite ana i ngā ara ki mua.