Kaupapa: Te Reo Māori

Kia rere māhorahora ai te reo Māori ki te ao ture

Te Kuru o te Marama Dewes

Ko te wānanga Reo Māori tuatahi mā ngā kaimahi o te ao ture, i tū ki Hoani Waititi Marae ki Tāmaki Makaurau. Hei tā te Hunga Rōia Māori o Aotearoa, ko te matū he whakawhanake i te reo Māori ā-ture.

Ko te wawata ia a Te Hunga Rōia Māori o Aotearoa kia rere māhorahora ai te reo Māori ki te ao ture.

Ko tā Alana Thomas o Te Hunga Rōia Māori o Aotearoa, “Ka noho tangata whenua te reo Māori ki roto i ngā kooti, e rere haere ana i ngā wāhi katoa o te ao ture, kāre e kore ko te reo Māori tērā e maringi ana i ngā ngutu o ngā tiati, ngā rōia, ngā tāngata katoa e noho ana i te ao ture.”

Tokomaha ngā kaiako reo i tae atu. Hei Tā Jeremy McCleod he whakahāngai i te reo ki ngā ratonga ture e tarea ai ngā kaimahi te tuitui i ngā rerenga kōrero ki roto i wā rātau mahi ia rā.

“Heoi anō tāku he kimi i tētahi reo e hāngai ana ki ā rātau mahi ki te ao koira te pai o te kīwaha he whānui tēnā kaupapa kia hea ki hea rānei,” te kī a Jeremy Tātere McCleod.

I tae atu a Eru Kapa-Kingi ki te ako, arā hei tāna, “Ko ngā akonga mō te reo mō roto i te kooti, pēwhea te whakawaha i ngā whakaaro ki roto ki tō tātau ki tēnā ao, he rerekē te reo ki reira.”

Māori mai, Pākehā mai, neke atu i te waru tekau ngā tāngata i whakakao mai, arā, he rōia, he kaiwhakawā, he ākonga whare wānanga anō hoki. Hei tā te kaiwhakahaere a Alana Thomas, hīkaka katoa ana te hunga nei kia Māori ake te reo ki ngā whakahaeretanga ā-ture.

“I ngā tau e rua e toru kua taha ake, i kitea rawatia e mātau te hunga rōia Māori o Aotearoa i te puawaitanga o te kōingo o tēnei hunga ki te ako i te reo ki te whakapakari i te reo ki roto i te ao ture,” te kī a Thomas.

He tauira a Eru Kapa-Kingi ki Te Whare Wānanga o Wikitōria e whai ana i te ture me te reo. Hei tāna, ka tika kia whai i tēnei ara.

Ko tēnei mātau e whakapau kaha ana e ū ana ki ngā kupu ka tika i roto i tēnā horopaki,” te kī a Eru Kapa-Kingi.

Ko te wawata ia a te Hunga Rōia o Aotearoa, ka tū te wānanga reo nei ia tau.