Kei te whakarite rautaki te kāwanatanga ki te whakatau i ngā kēnge

Aroha Treacher

Ko te mahi a te kēnge, e noho whakapapa ana ki Aotearoa. Tōna whā mano te rahi o ngā mema kēnge huri noa e mōhiotia ana, ā, i whai pānga ki te rua tekau mā rima ō-rau o ngā mahi kōhuru i te tau ki muri.  Nā kona te hiahia a te kawanatanga ki te whakatū i tētahi uepu motuhake ki te tiro hōmiromiro atu ki ngā mahi a ngā kēnge, ki te āwhina i ngā rangatahi kia kaua e huri pērā, ki te tautoko hoki i ngā whānau kia huri tuara atu ki tērā ao.

Ko te māpu mangaru tētahi o ngā kēnge hītori nui ki Aotearoa nei, koia hoki tētahi o ngā kēnge whānui atu. Engari, ki tā te mema hōnore nō te Mangu Kaha a Denis O'Reilly, kua hē ngā kupu awhina kua tau ki ōna taringa.

Ehara i te mea ko te māpu mangaru ko te mangu kaha anake ka tirohia hōmiromirotia e te kawanatanga mā te hangahanga ture hōu, engari, ko ngā kēnge katoa.

Ko te hiahia he whakatū i tētahi uepu tirotiro kēnge mā ngā pirihimana e ārahi, ki te whakarewa i tētahi hōtaka hei wetewete i ngā here ki ngā kēnge i roto i ngā whanau. Kei te hiahia hoki te kawana ki te whakatū i tētahi atu uepu motuhake hei aukati i te kawenga o ngā whakapōauau. Ko tētahi atu whainga, he whakakaha anō i ngā ture ki te titiro hōmiromiro i ngā kēnge kikino rawa

Ahakoa e hiahia ana te kāwanatanga ki te hautū i ngā kēnge, ko te āhua nei ka kore e māmā tutuki, natemea, e kore ngā kēnge e tere whatungarongaro.

Mārakerake te kitea he mea uaua rawa te hautū i te whanonga o ngā kēnge, engari, mā tēnei hānganga hōu e kaha ake te whiu o te ture i ngā mema kēnge ki ērā atu tāngata kua whai hara kē.