Kei te whakanuia a Ōrākau

Wepiha Te Kanawa

Tākiri ana te ata ki runga o Ōrākau, ā, e rere ana te apakura i runga i ngā puke.

He kotahi rau rima tekau ngā tau kua pahure, engari e kaikinikini tonu ana te mamae ki ngā uri i ēnei rangi tonu nei.

I roto i nga rā e toru, i patua kinotia ngā iwi e ngā hōia Pākehā, ā, i taua wā tonu i hua ai tēnei whakataukī rongonui "Ka whawhai tonu mātou, ake ake ake!", ā, i te rā nei i kaha rangona te wairua o aua kupu.

Hei tā te māngai kōrero mō ēnei āhuaranga i whakahaerehia ake ai i Ōrākau i te rā nei, tā Paraone Gloyne e kii nei “Kei te tangi tonu te ngākau.”

I tutū te puehu ki runga i ngā whenua nei, hēoi e tūmanakotia ana e te poari o Ōrākau ka hokona e rātou te whenua nei hei whakatū hui whakanuiatanga ia tau.