Kaupapa: Entertainment

Kei te whai tētahi kōtiro Māori i te taitara mō Miss World NZ

Mere McLean

He uri a Te Rua Wallace nō Te Arawa me Tūwharetoa, tekau mā waru tana pakeke. Kei te whai ia i te taitara mō Miss World New Zealand. 

Kei te whai a Te Rua Wallace i te kaupapa o Miss World New Zealand, ā, ko te wheako tāna e manako nui ana.

Ki tā Wallace, “He tino pai te whakataetae kua akona e au, te maha o ngā mahi, te mahi hīkoi, ngā mahi tū ki mua i te kāmera, ngā mahi kanikani hoki. Ae, he akonga tino pai, akonga nui.”

I tuku ā-īmera atu ngā whakatau mō tana uruhanga ki te huinga o Miss World New Zealand, rua tekau ngā whiringa kua uru nō ngā tōpito o Aotearoa.  Ia wiki ka haere ia mā runga pahi atu i Rotorua ki Tāmaki Makaurau ki ngā akoranga.

Ko tāna, “He kaupapa whakarangatira ai i ngā wāhine, te mahi o ngā kaupapa, ngā take kei tēnei ao, kei te whakahē i ngā wāhine. Engari tēnei kaupapa kei te whakatairanga i ngā wāhine, nō reira he kaupapa kia whāia.”

He tauira o mua ia nō te kura o Ruamata, ā, kō tōna Māoritanga tōna mana motuhake, ko tana whānau te mea nui ki a ia.

Hei tā Wallace, “Ehara ko te ataahua o waho noa iho te ataahua, engari ko te ataahua o roto kē te mea nui, ā, ko ngā mahi āwhina i ngā tangata kē, ka kite e rātou.”

Ka tū te hui Miss World New Zealand ki Tāmaki Makaurau hei te rua tekau mā rima o Paengawhāwhā.