Kaupapa: Te Reo Māori

Kei te werohia te rautaki reo Māori hou

Pōhiritia ana te Minita Take Māori me ngā kaiwhakapūmau i te reo maha o te rohe o Tāmaki Makaurau, ki runga o Te Puea Marae i te rā nei mō te hui whakamutunga, e kawea ana e te Puni Kōkiri mō ngā kai o roto i te Tauira Rautaki Reo Māori Hou a te Kāwanatanga.

Engari, arā tonu te wero i puta i tētahi o ngā mema o te Kaunihera Māori e pā ana ki te wāhanga e hanga ana ki te Poari Whakahaere Hou o roto i te rautaki, ko Te Mātāwai tōna ingoa.

Kei te taki atu a Titewhai Harawira, me te mea anō hoki, kihai ia e whakaae ana kia riro mana kore ai te Kaunihera Māori i roto i te tauira o Te Rautaki Reo Māori a te Kāwanatanga.

Ko Te Mātāwai tērā i roto i te tauira ka whakahaere i Te Taura Whiri i Te Reo Māori me Te Māngai Pāho. Ka mahi tahi ki te Minita Take Māori me te Minita Pūtea ki te whakahaere i a Whakaata Māori, ā, ka wānanga tahi me te Karauna mō te hanganga mai o ngā hōtaka Māori, kaupapa Maori hoki ā ēnei ratonga.

Ka whai wāhi hoki te kaupapa o Te Ataarangi ki te whakapiki i te reo i roto i ngā wā kainga, ko te kaupapa o te kainga korerorero tētahi, ā, ka waihanga tētahi kaupapa hou e rātou.

E whitū ngā mema ā-iwi o Te Mātāwai ka whakatūngia, mai i ngā rohe reo e whitū o te motu, ā, tokorua anō ka ahu mai i ngā rōpū Reo, Kaupapa Māori hoki. Ko te aronga matua a te tauira, he whakahoki i te mana o te reo ki ngā iwi.

Ka kapi te wahanga tono i ngā kōrero whakahoki mō te tauira, hei te 28 o ngā rā o tēnei marama.