Kei te wēpua anōtia a Countdown e te arero koi o Matapae

Kikii ana ētahi ipu i te ika, tāmure mai, tarakihi mai, me te maha noa atu. Katoa e whakapaetia ana e pai ana hei kai mā te tangata, engari kei te riro kē hei kai mā te maara, arā, ka konatunatuhia hei whakamomona oneone.

I kapohia ēnei pikitia i te raumati kua taha ake nei, he mea tango e Kevin Rogers nā runga i tana pukuriri. Kua tekau mā wha tau a ia e whakamahi ana i tēnei wāhi mahi para, ā, hei taana kua kitea e ia te maha o te ika e moumoutia ana. E ai ki ngā rihīti i ahu mai ngā ika i te wāhanga kaimoana o te kamupene Progressive ki Penrose, Tāmaki Makaurau. Te kamupene mahi kaimoana a te toa hokomaha, a Countdown.

E ai ki a Countdown, o āna ika katoa i te tau kotahi, he kore ira rua ōrau ka tau atu ki te wāhi mahi para. Waihoki, hei taana ko te nuinga he maramara ika, ā, ko tētahi wāhanga paku ko te ika me tōna katoa. Hēoi, i roto i ngā rā e whā i nga marama tata nei, e rua ngā wā i kapohia ai ēnei whakaahua, e whakaatu ana i ngā ika kāre anō kia tapatapahia, ā, ko te rihīti i tētahi rā e mea ana he ono ira whitu tana te taumaha. 

Kāti, kua eke rawa tēnei take ki te taumata whare pāremata inaianei. Kei te pakanga kē a Shane Jones i a Countdown mō ētahi whakapae kē atu, ā, ko tā te mema pāremata mō ngā kōrero hōu - me kōkiri he arotake.

Ko tā te tangata nāna i hika ai tenei tirohanga hōmiromiro, ko tā Kevin Rogers mō te take nei, me mate ururoa, kaua e mate wheke noa.