Kaupapa: Elections

Kei te ūpoko māro a Kelvin Davis ahakoa te āki o tana rōpū

Kei te tū ūpoko mārō te kaitono o Reipa a Kelvin Davis, ahakoa te āki a tana rōpū.

E kaha wero ana a Davis i te mema mo Te Tai Tokerau a Hone Harawira me tana mahi tahi ki a Kim Dotcom - ahakoa e tuki ana tērā ki tā Reipa rautaki kia humarie ai te whaiwhai pōti.

I ngā iwi o Te Tai Tokerau e hora ana i o rātou nawe, kua ngutu kuku kee a Kelvin Davis mō āna kūrakuraku.

Hei tā Kelvin Davis, “I whakapau ahau i oku whakaaro i runga o Pukamata noreira ka waiho ki reira.”

He tūmomo kaupapa i hia whakarite e Kelvin Davis hei whārangi ipurangi e tono putea tautoko ana i te hunga e whakahē ana hoki i tā te tokorua rā mahi tahi.

Hei tā Hone Harawira, “Kore au e mohio ana he aha kei roto i tona ngakau, engari taku kitenga ki wera mahi, mahi tukino, mahi takahi i te mana, mahi taurekareka.”

E ai ki te kaiwhakahaere whaiwhai pooti a Kelvin Davis i tētahi īmēra i tērā marama - ēhara ko John Key te hoariri - ko Harawira kē, ka mutu mā tēnei kaupapa pea e whai pūtea ai rātou i a Nahinara.

He rautaki i whakahēngia e te taumata o runga o Reipa nā te wairua kino me te takahi i ta te rōpū ake rautaki.

Heoi, ināpō rapa i a Kelvin Davis tana nama pēke me te whakatairanga i taua rautaki, aa, hei tana, e kore ia mo te tango.

Hei tā Harawira, “E rapu ana ia i ona moni mai i te hoaririr, e rapu moni ana mai i te hoariri o Mana me te hoariri o Reipa.”

Noreira he raru ano o waenganui tonu i a Reipa, ka mutu ko te taha maui noa o te papa torangapu kua raru i tēnei tohe, ā, na wai i he katahi ka he kē atu mō te taha maui e mea ana a David Cunliffe karekau a Ipurangi Mana mō te wehai wāhi ki tētahi kawanatanga āna.