Ngā kaupapa: Business, Pacific Affairs

Kei te tū ngā pihi i Tonga mō ngā āhuatanga pakihi o Āhia

I te whenua o Tonga, otirā ki ngā moutere katoa o Te Moananui-a-Kiwa, he whāiti te rāngai mahi, ka mutu, he uaua mā te tokomaha te whai mahi.  

He tūāhua, e ai ki te iwi taketake o konei, kua taumaha rawa atu i te urunga mai o Ngāi Haina, mātua rā mō te taha ki ngā toa hokomaha.

Mārakerake te kitea i te whai wāhi nui o Ngāi Haina ki Tonga.  

Kei te takiwā o te toru mano ngā toa pakihi i konei, neke atu i te haurua e whakahaeretia ana e te Hainamana.  He āhuatanga e whakahōhā ana i te haukāinga.

Kua iwa tau ngā mahi arotake a Pauline Siasau i te rāngai pakihi o Tonga. 

I ngā tau ki muri tutū ai te puehu i Tonga, ka mutu tokomaha ngā toa hainamana i tahuna ki te ahi.  He tohu hei tā ētahi o te whakatakariri ki a Ngāi Haina e riro nei i te rahi o ngā hua pakihi.

He amuamu kua tirohia e te Kāwanatanga o Tonga, heoi, he take tōrangapū uaua inā te rahi o te pūtea āwhina ka tukuna e Haina ki Tonga. 

Hei ara kaupare i tēnei tū raru, kua whakatapua e te Kāwanatanga o Tonga ki āna kainoho anake ngā rāngai tāpoi me te ahuwhenua, waihoki te hoko i ngā kai matua pēnei ki te pata me te huka.

Ka noho pea tēnā hei tauira mā moutere kē atu, i te kanohi o Te Moananui a Kiwa e rerekē haere nei.