Kaupapa: Politics

Kei te tū māia te wahine nāna te petihana kia tangoahia te taitara "Tā" i a Sir Bob Jones

Te Kuru o te Marama Dewes

Kei te tū māia te wahine nāna te petihana e karanga kia tangoahia te taitara "Tā" i a Sir Bob Jones, ahakoa tana wero kei kawea te take ki ngā kōti. I hua ake te petihana i tētahi tuhinga nā Sir Bob Jones mā National Business Review, e karanga ana mō tētahi "Rā Māori Whakaiti".

Hei tā Sir Bob Jones, ka hāmene ia i a Renae Maihi i runga i te tikanga o te kōrero takahi. I kōrero ia ki tētahi kaipāpāho auraki, ko tāna, ka pai tana tākaro me tēnei wahine. Heoi, i mea mai a Renae Maihi i te rā nei kāre ia e tūpou.

Ko tā Renae Maihi ki awau, kāre anō kia rongo kōrero i te tīma ture a Sir Bob Jones heoi kei te rongo ia i te tautoko. Neke atu i te whā tekau mano ngā waitohu kei te petihana, ā, kei te eke tonu. Ināianei kei te tono tautoko ā-ture a Renae Maihi, ā, kei te whakatakoto rautaki e pā ana ki te petihana.