Kaupapa: Entertainment

Kei te pae o Spotify ngā pūoro reo Māori o Moana

Te Kuru o te Marama Dewes
Tawaroa Kawana features on Moana Reo Māori soundtrack - Image / File

Nōnātata nei whakaputa ai te Te Hopukanga Puoro o te Kiriata Taketake o Moana, kua roa nei e kōingotia e te hunga whakarongo. He kaupapa nā Mātewā Media i whakarite, nā Rob Ruha ngā waiata i whakarite. I kōrero tētahi o ngā kaiwaiata, a Tawaroa Kawana, e pā ana ki ōna haerenga i te ao pūoro me tēnei ekenga hou ōna. 

Kia Māori ai Te Reo, waiatatia. Kōia tā Tawaroa Kawana.

"Nōku e tamariki ana ko Lion King te kiriata. Ināinaei ko Moana, Reo Māori."

Kua rongonui haere a Tawaroa Kawana i āna mahi waiata mō te rōpū Maimoa, heoi, kei te takahi hoki nei a ia i tōna ake ara.

"E mahi tahi ana au me Maimoa me ētahi atu rōpū anō hoki, engari ko te whainga matua kia puta ake au ki tōku ake huarahi."

Kātahi anō te Te Hopukanga Puoro o te Kiriata Taketake o Moana ka puta mai, ā, nā Tawaroa Kawana tētahi o ngā waiata matua a te kiripuaki Māui, arā rā, ko 'Mihi mai rā'.

"I tonoa au e Rob Ruha me Tweedie Waititi, kātahi nei te wheako ko tērā te noho tahi i a Rob, i a Maisey, i a Tweeide mā, he rawe."

Ko tōna wawata kia pāorooro ai ngā waiata nei ki ngā kōhanga, ki ngā kura otirā ki nga pakitara kei tēnā moka, kei tēnā tarawāhi. 

"Ko te whainga matua kia puta ēnei waiata ki te ao, kia waiatia ngā waiata e ngā tamariki, kia Māori ake ai tō tātau reo i tō tātau anō whenua."

Ahakoa tokomaha ngā whānau e whanga tonu ana ki te kiriata nei, hei tā Tawaroa Kawana mā ngā waiata nei e ngata ai te ngākau.