Kei te noho rawakore ētahi whānau o Te Matau a Maui i tētahi kamupene hīanga

Aroha Treacher

Kua tinihangatia ētahi whānau rawakore o Pā Harakeke me Camberley e tētahi rōpū e kīia nei ko DSN Youth Hampers, ko tā rātou he poapoa i ngā whānau kia hoko pāhera mīti mā te utu harangote. Ināeanei, kua mahue pohara mai ngā whānau, kāhore he moni, kāhore hoki he kai.

He wā taumaha rawa tēnei mā Donnett Dellow me āna tamariki tokoono, kāore anō tā rātou pākete miiti kia tae mai ahakoa i utua, kāore anō hoki ā rātou pūtea kia whakahokia noa.

Hei tā tētahi kainoho o Pā Harakeke, tā Donnett Dellow e meingia iho nei, “Horekau e tika ana kia huri tuara atu, ā, kia whakapoapoa ngā hāpori Māori i runga tonu i te whakapae hē.”

Koia tētahi o ngā tini tāngata kua raru i a DSN Youth Hamper otira ko Grace Advocacy Trust Meat Hampers tētahi atu anō ingoa ō rātou. Kāore aua ingoa i rēhitatia ki ngā rēhita matua o Aotearoa.

Mai i te wā i timata ai tēnei mahi tinihanga kua whakatewhatewhangia tēnei take e te Manatū Kaihokohoko, ko te hiahia kia riro ki a rātou ētahi atu anō kōrero mai i te iwi whānui.

Ko tā Josephine Bartley, mai i Te Manatū Kaihokohoko, “Tēnā rā e te iwi, wāea mai kia mātou”

Ko te kaupapa nei, ka tāea e te tangata te utu ia wiki, otirā, i pātōtō ngā kaihokohoko ki ngā tatau, ko ngā pākete miiti me ngā kai te poapoa, ko te utu ia, he toru rau taara piki ake.

Tē kitea tēnei kamupene, katoa ō rātou tau waea kua whakakorea. Kua pā tēnei raru ki etahi atu tāngata i te motu, heoi ko te īnoi a te Manatū Kaihokohoko, kia kaua e tāmoko i ngā pepa a ngā kaihokohoko e pātōtō atu nei ki tō kuaha, me whai kupu āwhina a-ture i te tuatahi.