Kei te noho puku tonu te poari o Whakaata Māori

I a Whakaata Māori e takatū ana ki te whakanui i tana huritau tuangāhuru, e werohia tonutia ana tana poari mō ngā tikanga tohu i tētahi upoko hou hei ārahi i te kaupapa ki tua o te awe māpara. E ai ki ētahi pūrongo pāpāho, ko Paora Maxwell e whakapaetia ana mo te tūranga, he kaitono i raru i te rauna tuatahi o ngā kōwhiringa nā tētahi petihana aukati i a ia, i waitohungia e te tokomaha o ngā kaimahi o Whakaata Māori.

Ko tā Ian Taylor, he mema poari o mua o Whakaata Māori, “ki te tohua rātou i tētahi i runga i ngā mōhioranga kei a rātou, ā, me te rongo atu anō ki ngā hiahia a ngā kaimahi, me mātua whakaaro rātou ko te tangata e whai atu ai i te tūranga mahi, ā, ko ia te tangata tino tika hei kawe i tēnei kaupapa”

Ko Ian Taylor tētahi mema poari i te wā o ngā uiui tuatahi mō te tūranga tumu whakarae. Nā wai rā ka rihaina ia, hei taana, nā te kore whai tika o te poari i ngā tikanga tohu kaitono.

Ko tā Ian e mea nei “I mahi au i runga anō i te mea me tika anō rā ngā mahi. Ā, ki taku whakapae, horekau ēnā mahi i oti i ētahi i aua wā. Nā, e whakapono ana ahau kei te pūmau rātou ki aua tikanga iaianei”

Ko tētahi o ngā wero i puta i te hikanga o tēnei take ko te hononga tata i waenga i te heamana o te poari a Georgina te Heuheu me Paora Maxwell. E ai ki a Ian Taylor rawa a te Heuheu i mahi hē i runga i tērā take, engari, e noho totara wāhi rua tonu ana ngā mema pāremata.

E ai ki a Shane Jones, mema pāremata mō Reipa e mea atu ai “taku hōhā ki te Tumuaki, ki te Tiamana o te poari o Pāho Māori. Pai kē me noho wehe kē mārika tēnā wahine, kaua tētahi aha ōna e paa atu ki tēnā whakatau.”

E ngutu kukū ana te poari i te rangi nei, engari hei tā te HeuHeu i tētahi tauakī, e pae ana te waka tohu kaitono ki uta. E ai ki ngā whakamārama ki a Te Kāea kua kōrerohia kētia ētahi kaitono mō tā rātou kore whiwhi i te tūranga i te rangi tonu nei.

I kōrero ā-waea atu tā mātou kaikawe pūrongo take tōrangapū, tā Maiki Sherman ki a Paora Maxwell i te rā nei, engari hei taana horekau āna kōrero i tēnei wā. I tuku tono uiui hoki mātou ki te Minita Take Maori ki a Pita Sharples, ā, ko taua āhua rā anō hei taana he take mā te poari.

Kāti, i tua i a Maxwell, ko Richard Jeffries rātou ko John Bishara ētahi kua whakatū ake ā rāua ringaringa mō te tūranga tumu whakarae nei. Mā te taka o te wā noa ka kite ake, ko wai ka hua ko wai ka tohu.