Kei te hāmenetia Te Ara Poutama e ngā tamariki a Anna Kingi

Aroha Treacher

E rima ngā tau mai i te matenga o to rātou whaea, a Anna Kingi, kei te tete ngā niho ana tamariki, kia riro ma Te Ara Poutama o rātou nawe.

Na te ringa awhi o to rātou roia a Eric Forster, i tukuna e rātou he kereme motuhake, he kereme whakahē i te mahi a Te Ara Poutama, i te kōti teitei o Ahuriri.

Engari ko tā āna tamariki, ehara ko te whai pūtea te tino take, ko te whai i te tika mō to rātou whaea te mea nui.

I te rua tekau ma tahi o Whiringa ā Nuku i te tau rua mano tekau ma waru, i a Kingi e mau ana i te whare herehere o Tāmaki Makaurau ma ngā wāhine.  

Nana te patene whawhatitata i pēhi, kia mohio ai ngā kaimahi kei te raru tona manawa.

Engari, kaore ngā kaimahi i aro ki ana inoi, ka pau te kotahi haora neke atu, i kitea e rātou tōna tupapaku.

I kitea tētahi whakatewhanga, huhua ana ngā hapa i mahia e te whare herehere.

Kaore Te Ara Poutama i te hiahia kōrero mō tēnei take, engari i tukuna mai e rātou he tauākī.

Hei ta rātou, i whakāetia kua whai hara nui ngā kaimahi i mahi i taua po, ka mutu, he whakapaaha mutunga kore kua tukuna e rātou ki te whānau.

Ki ta Te Ara Poutama, mai i taua wā i mate a Kingi, kua whakapaitia ake o rātou tikanga mahi, engari, mō ana tamariki he tūreiti rawa o rātou whakapāha.

Ko te tumanako ka rangona to rātou kereme i tēnei tau, hei mea whakatau i te wairua o ana tamariki whānau hoki, he mea kua roa nei rātou e whai ana.