Kei te eke panuku ngā kaipara o Aotearoa i Ngā Taumāhekeheke Kaipara Hauā Ōrimipia

Kei te eke panuku, eke Tangaroa ngā kaipara o Aotearoa i te rangi tuawhā o Ngā Taumāhekeheke Kaipara Hauā Ōrimipia ki Rio de Janeiro.

Ō mohoa noa nei, e iwa katoa ngā mētara i whakawhiwhia ki ngā hautoa o te wā kāinga.

Me te aha, e kōtata mai ana te pae tawhiti ki te uepū kaipara hauā o Aotearoa kia riro i a rātou tekau mā waru katoa ngā mētara i te roanga o te whakataetae.

Kua eke pae hou te kaikauhoe a Sophie Pascoe i kake i tōnā ake wā toa nō ngā Pararimipia i te tau tekau ma rua ki Ingārangi ma ngā hēkona e rima. I wikitōria a Pascoe i te kōura i te kaupaheko rua rau mita kia kapo ake ai tana mētara tuatoru i tēnei tau, otirā anō tana kōura tuarua.

Ā, ko te uri o Ngāpuhi a Emma Foy me tōna hoa eke pahikara a Laura Thompson i eke panuku eke pahikara ki te mētara hiriwa i te ekenga torumano mita. Ka oti mai i ngā hēkona e toru kei muri i ngā kaieke Piritana a Lora Turnham me Corrine Hall.

Tērā hoki te kaioma a Liam Malone e aru ana i tōna mētara tuarua ki ngā whakataetae whai muri tāna kapo ake i te mētara hiriwa i ēnei rangi okioki. Ka toa a Malone i te reihi rua rau mita me tōna wā toa o te rua tekau ma tahi hēkona ira toru tekau ma toru kia uru tōtika ki ngā whiringa toa hei āpōpō.

Ahakoa nānā te kōura tuatahi o Aotearoa, kīhai a Anna Grimaldi i whakaoho i tana hautoa i ngā whiringa toa o te oma kotahi rau mita, ka kapo kē i te wāhanga tuawha. Hēoi kīhai tēra mō te karo i te aroha mo te toa o Amerika mō Deja Young. 

Tuaritia: