Kei te aro atu ngā pūkenga kapa haka ki te ao pūoro whānui

Te Kāea

Kua rangitāmiro ngā pūkenga o te ao kapa haka kia piata anō rā i te rangi.

Nō te rangi nei, puta ā-ipurangi ai te kōpae kōkuhunga a te tira ‘Manea’, me te mea anō hoki, ko te katoa o ngā reo i ēnei waiata nō nāianei, he Māori.

Kua hono a Amomai Pihama, rātou ko Selwyn Tepania, ko Hemi Peke, ko Atarangi Putamainu me Ani-Piki Tuari kia whakaputa mai ai tēnei tō rātou kōpae tuatahi hei rōpū kotahi.

E ai ki te kaiwaiata matua o te rōpū nei, ki a Amomai Pihama “Kei te paa ā mātou nei waiata ki ngā āhuatanga katoa o te oranga o te tangata, ā, ko te whainga nui kia whakatangihia he momo waiata e kaingākautia ana e te tini tangata, hei kōpūtahitanga mā ngā kaiwhakarongo.”

He mea hoko te kōpae hou nei ki iTunes (www.apple.com/nz/itunes/), ā, mō te Mane e haere ake nei puta ai te kōpae tūturu nei.