Kaupapa: Entertainment

Kātahi te tau angitū ko tēnei mā Stan Walker

Aroha Treacher

Ko Beyoncé Knowles-Carter tētahi o ngā ingoa rongonui rawa atu o te ao puoro, he hau tipua huri noa i te ao.

Otira i te wā i rongo ai a Stan Walker, koia tonu ka whakatūwhera i ngā konohete a Beyoncé, tōna tuatangata, kīhai ia i whakapono atu.

Ka tau mai a Kuini Bey ki Aotearoa i tēnei marama mō tana whakaaturanga huri i te ao e kiia nei ko Mrs Carter.  E whā katoa āna konohete ki te whare tapere o Vector ki Tāmaki Makaurau.

Tōna tikanga, ko te kaitapa oro nō Ahitereiria ko Iggy Azalea te kaiwhakatūwhera i te konohete, heoi, tē taea e ia te haere mai, nā kōna, i wātea ai te ara ki a Stan.

I tēnei wā kei te haereere haere a Stan ki ngā tōpito o te motu mō tana whakaaturanga World Tour o Aotearoa, hei tāna, he mea whakamānawa, ā, noho whakaiti katoa ana ia.

Nō tana wikitōria i te whakataetae Australian Idol i te tau rua mano ma iwa, kua eke panuku a Stan i Aotearoa nei, e rima hoki ngā tohu waiata kua riro i a ia.  Heoi, ki tāna, he painga nō te Atua tōna aheinga ki te tū hei kaiwaiata whakatūwhera mā Beyoncé.