Ngā kaupapa: Kapa Haka, Te Matatini, Te Reo Māori

Ka whiriwhiri ake he aha ngā paearu mahi mō te reo rangatira i roto i ngā aromatawai kapa haka o Te Matatini

Kua rūnanga atu te kōmiti whāiti o te Matatini ki Te Whare Wānanga o Waikato ki te whiriwhiri ake he aha rā ngā paearu mahi mō te reo rangatira i roto i ngā aromatawai Kapa Haka o Te Matatini 2017.

Hei tā Pānia Papa, tētahi o ngā kaiwhakawā o te Matatini kātahi anō ka hori, ko te whāinga, kia tika ai te kawenga o ngā mahi.

Ko tā ngā pūkenga o te reo, o ngā tikanga Māori me te kapa haka, he rapu i te ara tika e kitea ai te mana o te reo Māori ki roto i ngā mahi kapa haka.

E ai ki a Papa, “Ko tētahi haurua he kaihaka tonu, ko tētahi haurua he mātanga reo.  Ko tētahi taha ko te reo te kai, ko tētahi taha ko te haka te kai.  Nō reira i te piringa o ērā taha e rua e kitea pea he huarahi e kotahi ai ngā whakaaro.” 

I Te Matatini kātahi anō ka hipa, ka mana te wāhanga ki te reo Māori, ā, ka riro mā ngā kaiwhakawā o tēnā wāhanga, o tēnā wāhanga e aromatawai anō i te kounga o te reo.

Nā reira, hei tā te māngai o Mātaatua mō Te Matatini, hei tā Te Kahautu Maxwell,  ko te mahi ināianei, he whakarite i ngā pouaru e hāpai ana i ngā kaiwhakawā ki te whakawā i te reo ā-tuhi.

Hei tā Te Kahautu Maxwell, "Ko tēnei hui i tēnei rā he whakatau, he aha te wāriu o te māka, ka uru ki roto i te tōpū o ngā māka, e whai mana ai."

Ā te wā ka puta ngā tūtohunga, ka kawea atu ngā whainga ki ngā māngai.  Hei tā Pania Papa mā te kawe i ngā paearu tika mō te reo, ka mau i te reo te mana, te tapu me te wehi o ngā whakaaro a ngā mātua tūpuna.

Ki tā Papa, “Ki te kore ērā āhuatanga e tika, ki te kore hoki e whaia ko te huarahi o te whakaaro Māori, e kitea ai te wairua Māori i roto i ērā mea, ka memeha te āhua o te Māori i tēnei ao.”

Ka puta ngā paearu mō te reo mō roto i ngā mahi kapa haka a te marama o Noema.