Ka whakatōngia e Ngā Koaru ngā tikanga Māori ki tētahi haikura i Te Urupu

Kua whā tau te peka o Ngā Wāhine Māori Toko i Te Ora, ki Te Uru o Ahitereiria,e whakahaerehia ana. Ka hui ngā mema a te Rāhoroi tuarua o ia marama, ā, ko tētahi o ngā kaupapa hou ka tīmata ake i tenei tau, ko te awhi i ngā tauira me ngā kaiako no tetahi haikura i te tonga o Te Urupu ki ngā taonga ā te Māori.

Ko Ngā Koaru, he peka ano o Te Rōpu Wāhine Māori Toko I Te Ora, hei ngaki i te kāri i te Uru o Ahitereiria. Ka tika, ko te mahi a ngā whaea, he hapai ake i te Māori kua whai kainga rua ki Te Urupu.

Hei tā ngā whaea nei, i te whakawhitinga mai a te Māori ki ao i Te Urupu,  me whai rautaki ano ratou, ta te mea, e hia ke nei ngā taima, kua kite rātou i te Māori e rongo ana i ngā taimahatanga o te wa.

I tera tau i timata ngā mahi ātawhai a ngā Koaru ki te taha o te Komiti Whakahaere i te Haikura o Warnbro, i raro i te kaupapa e karangatia ana ko MAPI, Māori and Pacific Island Project. Mai i taua mahi ra, kua toko ake tetahi turanga, ki te whakarata i te hunga Māori, a, ka timata aua mahi ki te Kura i tenei tau me te wawata kia timata hoki i ngā mahi kapa haka.

I roaka mai te whakaaro mo Ngā Koaru i a Ina Edwardson o Te Whakatohea. Kihai te rōpu nei i te rōpu aru moni, ko te whainga matua, he tautoko, he atawhai, he napinapi hoki ake i te Māori.