Kaupapa: BUDGET

Ka werohia te kāwanatanga kia aro kia aro te tahua pūtea 2015 ki te hunga pōhara

updated

Ka werohia te kāwanatanga e te ratonga o Unicef me āna rōpū tautoko, kia aro mai te tahua pūtea 2015, a Wiremu Pakeha, ki te pōharatanga e poke nei i o tātou iwi, o tātou whānau, me a tātou tamariki.

Koinei te take i tīmatahia ai he petihana, me te tūmanako ka hokihokitia te kotahi rau mano īngoa, hei whakamana i te tono a ngā rōpū nei.

Ko Unicef kei te arataki i te petihana i whakarewahia i te rā nei, ki runga i te aratuku Action Station, me te mea nei e toru ngā tino whainga o te wero nei.

Tuatahi, kia āta kitea e whakarerekētia ana ngā ahua mō ngā tamariki.  Tuarua, kia whakaorite i ngā manākitanga a ngā tamariki ki ērā o ngā kaumātua. Tuatoru, kia whakawhiwhia ngā pūtea take tamariki ki ngā kaimahi katoa.

E ai ki te kaihautū o Unicef Aotearoa, a Deborah Morris-Travers, “Kia kitea te tino mahi e rerekē ai te noho pōhara a ngā tamariki, kia whakapiki i ngā utu hei takai i te pōharatanga i Aotearoa.”

Kei te tautokohia te tono nei e tētahi māngai take tamariki a Anton Blank, nā te mea ko ngāi tāua te iwi Māori me ngā tamariki Pasifika ka whai hua hei te otinga.

Hei tā te Māngai Take Tamariki, a Anton Blank, “O ngā tamariki toru rau mano e noho ana i roto i te pōharatanga neke i te rima tekau ora he Māori he Pasifika.”

Ahakoa te whakatauki e kī ana, "E kore e taea te whakatika ma te whiu pokanoa atu i te moni" engari e whakahētia ana tērā kōrero e Deborah.

Hei tāna, “Ka taea tonu te whakatika mā te whiu atu i te moni, mā tērā ka āhei ngā mātua ki te mahi mō ngā utu tōtika, hei tiaki i ngā tamariki.”

Nā reira ko tēnei petihana kua whakarewāhia ki runga ipurangi, ka whātoro atu ki ngā kokonga katoa o te motu, o te ao, ā ko te wero i tēnei wā ki ngā iwi kia aro mai, kia tatuoko mai te kaupapa mō a tātou tamariki te take.

Hei tā Anton Blank, “Mēnā ka ea te kotahi rau mano īngoa, e kore te kāwana e tāea te karo, nā reira kia kaha mai Māori mā, tāmokohia te petihana.”