Kaupapa: Boxing

Ka tūtaki ngā kaimekemeke o Aotearoa i a rāua hoariri

Tamati Tiananga

Mātua rā i te tūrangawaewae o ngā hakinakina Māori, hei te Rātapu e tū mai nei, tutū ai te puehu i a Robert Berridge rāua ko Joseph Parker i roto i tā rāua whakaekenga atu ki Amerika. Me te mōhio, ki te eke rāua, he tatau nui ka puare ki a rāua ki reira.

I tūtaki atu ngā toki kai meke o Aotearoa i a raua hoariri mō te wā tuatahi.

He tāroaroa te hanga, he ono ira whā pūtu tōna teitei, he toa o te ao nō Rūhia, ā, kāore ōna hingatanga, ko Vasily Lepikhin tōna ingoa.  Koinei te hoariri a Robert Berridge hei tēnei Rātapu. 

He iti nei te reo kōrero Pākehā tō Lepikhin, engari he pukenga ia ki te whawhai.

Kua rua wiki a Lepikhin e whakaharatau ana ki Ohio ki te whare whakapakari o Mike Tyson.

I te wā kāinga whakangungu ai a Berridge ki te taha o tana kaiwhakahaere a Vasco Kovačević.

Engari mō Joseph Parker, kua taunga rā ia ki ēnei tū āhuatanga, e rite ana ia mō te pakanga atu ki a Keith Thompson.

Otirā mā te whakapau kaha, te whakapeto ngoi ia e eke ai te kaimekemeke ki te keokeotanga o te maunga.

Ao ake i te ata hāpara, kei te whakaharatau a Parker.

Ia ata, ka waru kiromita te roa o tana oma, ā, hei whakahihiko anō i a ia ka whakarongo ia ki ngā waiata rangatahi.

Heoi anō, hei te tekau mā tahi karaka he mekemeke te mahi me tana kaiako a Kevin Barry.

He āhua rite tonu ngā whakaharatau a Berridge; he omaoma te mahi, he mahi mekemeke hoki.

Mārakerake te kitea, mā te whakapeto ngoi me te whakaheke tohau e eke ai ngā kaimekemeke ki te keokeonga o te tākaro.