Ka tapaina anōtia tētahi uri o Kahungunu e Te Tari Taiwhenua

Aroha Treacher

E rua tekau mā toru tau ki muri i tapaina a Prince-Eugene Hohua Price e ōna mātua, ā, i whakaaetia e te ture, hēoi, i tēnei wā kāore Te Tari Taiwhenua e whakaae ana kia pupuru tonu i a ia taua ingoa. Kua toru marama ināianei rātou ko tōna whānau e whawhai ana kia pupuri tonu ai i a ia tōna ake tuākiritanga.

I te wā i ngaro i a Prince-Eugene tana tiwhikete whakawhānautanga, i tono atu ia mō tētahi tiwhikete hōu. Hēoi, i te taenga mai o taua tiwhikete hōu, ohorere katoa ana rātou ko tōna whānau, inā rā, i murua tōna ingoa Prince i ōna ake rekoata kāwanatanga.

Hei tā Prince nō Ngāti Kahungunu, “Kei te rongo ake rā i te ngarohanga o taku tino tuākiritanga. Koirā tāku e rongo nei. Kāre au i te rikoatatia ā-ture nei”

Kāti, e ai ki tōna mama, a Peggy-Joe Mitai, nō roto mai o Ngāti Kahungunu anō hoki e mea nei “I pōhēhē au i te whakatoi rātou i a ia i runga i te mea kua tuku i a rātou te tiwhikete, ā, horekau te ingoa ‘Prince’ i tāngia ake”

I tāngia te ingoa Prince-Eugene ki tana tiwhikete tuatahi, he mea tapa nā tōna māmā, nā Peggy-Joe, nātemea, he ingoa motuhake, he ingoa pūmau ki tōna ngākau, engari kua takahia taua mana ināianei.

Hei tā Peggy-Joe anō rā e kii nei, “Ehara i te tika, ehara i te pai ki tuku atu mā rātou e tohu he aha rā te ingoa tika mōna”

Kua toko ake tēnei raru nā te whakamanatanga o te ture whakawhānau pēpē, mate, mārena hoki o te tau kotahi mano e iwa rau iwa tekau ma rima, nā kona, he hē ā-ture ināianei te tapa i ō tamariki ki ngā ingoa taitara pērā i Wheao, Tā me Kīngi hoki, engari i whanau mai a Prince Eugene i te tau iwa tekau mā tahi.

I whakatewhatewhangia tēnei take e Te Tari Taiwhenua, engari i kī tonu atu rātou ki te whānau, tē tāea te pupuri i taua ingoa, tē tāea hoki te tā atu ki te tiwhikete whānau o tana tama. Engari, kua rerekē ināianei te whakatau a Te Tari Taiwhenua, me te kī ake, nā tētahi hapa a-tuhi i tōna whānautanga mai ki te ao, i raru ai.

E ai ki a Jeff Montgomery, te tūmuaki Registrar General e mea atu nei rā, “kua whakapāhātia kētia mātou”

He takaroa, he wā pēhi, he mamae hoki ēnei marama e toru kua pahure ki te whānau, engari, kei te anga whakamua rātou ināianei. Kua tukuna e te Tari te tiwhikete hōu, kua tāngia ki te ingoa tūturu o Prince-Eugene Hohua Price.