Kaupapa: ANZAC

Ka taki whaikōrero tētahi rangatahi Māori nō Rotorua i te hui whakamaharatanga ANZAC ki Gallipoli

I te atapō nei, ka rere te kauhau a Jack Potaka, uri o Ngāti Hauiti ki Karipori i Turkey, i mua i te aroaro o te tini ngerongero i whakakao atu ki reira, mō te wahanga tuatahi o ngā whakamaharatanga o ANZAC.

I te timatanga mai o te marama nei ka riro i te uri nei o Ngāti Hauiti, a Jack Potaka, amokura tuarua o te Kura o Raukura, te honore nui kia rūpeke atu ki Karepori, Turkey i tana wikitoria i te whakataetae whai kōrero ANZ RSA Cyril Bassett VC, i tū ki Pōneke.

Ko tana kauhau toa tērā, i hangai pū atu ki tōna tupuna, te kaiwhakahaere wakarererangi Māori tuatahi o te ope tauā waka rererangi o Aotearoa, arā ko Porokoru Patapū John Pohe i uru atu ki te Pakanga Tuarua o Ao.

Hoinō, nō te rā nei, ka huri te aroaro o Potaka ki tana takingaroa, mai Aotearoa, ki Anzac Cove i ngā rā kua hori, tae rawa mai ki Karīpori i te ata nei, me te whakamahara i ngā hoia kihai i rangona whānuitia.

Ko Jack Potaka tērā i whai wāhi atu hoki ki te whakamaharatanga nui o te ata, ā, ko Kāwanatianara Tā Jerry Mataparae tētahi o ngā māngai nō Aotearoa i tae ā-tinana atu.