Kaupapa: Housing

Ka rongo tētahi māmā, he tekau ōna tamariki, i te taimahatanga

Aroha Treacher

He wā taumaha rawa tēnei ki tēnei māmā e toru tekau mā iwa ōna tau, nātemea, kei te noho ia me āna tamariki tekau, he rua tau te pakeke tae noa atu ki te rua tekau mā tahi te pakeke, ki roto i tēnei whare kaporeihana, e toru noa iho ngā rūma te rahi o tēnei whare ki Maraenui.

Hei tā tēnei māmā, a Airihi, “He anuanu. Kāre rawa au e rata ki tēnei whare. Kāre au mō te tuku tono kia whai manuhiri ai mātou, ā, kei te patua rawatia e te whakamā i te āhua o tō mātou ruma noho”

Tika tāna me whakamoemiti atu mō tēnei kainga, engari e taruke ana rātou nā te maha o ngā tāngata e noho ana ki roto. Ahakoa i inoi atu a ia ki te Kaporeihana a Whare kia hūnuku ai rātou ki tētahi kainga nui ake, kāore anō āna īnoi kia āminetia e rātou i ngā tau e rua kua hori. Nō reira kei wāhi kē a ia e rapu kainga ana.

Hei taana anō, “I tēnei tau tonu, e hia kē nei ngā whare nui ake i tēnei kua whakatewhatewhangia, me te mea anō hoki, i a te wā, i a te wā, ko taua āhua rā anō, ko te whakautu, e kao!”

I tae atu a John Key ki Maraenui i tērā wiki mō te wā poto, mō te whakarewatanga ake o ngā whare kaporeihana hōu i taua rohe tonu, i poroteehi atu ngā kainoho ki a ia, engari i tēnei wā kei warea katoatia rātou e te riri.

Ka rere tonu ngā auē o tēnei mama, e kii nei “Kia whai whare hōu mātou i a koutou, kua rite au ki te moa, ka ngaro”

He mahi uaua mō tēnei māmā me tana kotahi te pikau i te kete kai ki āna tamariki, otirā, ko taana noa e whai nei kia whakangāwari ōna taumahatanga, he whare rahi ake i tēnei mō tōna whānau.