Kaupapa: Employment

Ka pātaihia e tētahi rangatira Māori he pēhea te mauri tau o ngā māngai Māori o Reipa

updated

Kua puta te karanga i te kāhui mema pāremata Māori o te Rōpū Reipa kia tautokotia ngā kaimahi patu mīti e ngā rangatira a iwi i a rātou whakawhitinga kōrero kirimama me te kamupene o Talleys.

Kua neke atu i te kotahi tau ngā whakawhitinga kōrero e haere ana, engari kaore tonu kia tatu noa.

Kua whai torohaki i runga i te mōhio e tiro hōmiromirotia ana tēnei take inaianei.

Heoi, kua kitea hoki tētahi ngoikoretanga o te kāhui Māori o Reipa ina hoki kaore i a rātou te mana whakatau i tēnei take. E ai ki a Raniera Tau koia tēnā ko te noho ki ngā turu apitihana.

Ae e whakakoi ana a Raniera Tau i ana maripi, engari ko wai tena e tapatapahia ana?

E ai ki a Raniera Tau, “E hia rainei ngā mema Māori o reipa i tēnei wā ki roto i te pāremata nā taku e whakahoki atu ana ki a rātou he aha rātou kīhai i whakatatu i tēnei take tino nui mō tō tātou iwi?”

Ae mārika kua tuhi reta a Reipa e rapu tautoko ana i ngā rangatira a iwi, he tauira hei tā Raniera Tau o te mana kore o ngā turu apitihana.

Ki tā Tau, “Hatia ko wai ki roto i ngā rōpū āpitihana ko wai ki roto i te kawana i te mutunga ko ngā mea kaha ngā mea ka whai wāhi ki roto i ngā ture.”

E ai ki a Nanaia Mahuta, “E kao, e hē ana mātou ngā tinihanga a te kāwanatanga ki ngā ture mahi koina te take kei te ū mātou ki tēnei kaupapa ki te tautoko ngā kaimahi i mahi ki tēnei wāhi.”

Kāti, kua neke atu i te kotahi tau ngā whakawhitinga e haere ana i waenga i te uniana kaipatu mīti me Talleys, he kamupene kua tohe a-ika haehae nei i roto i ngā whiriwhiringa take kaimahi.

I te tau rua mano tekau mā rua i whakatauria te puehu i waenga i a Talleys me ana kaimahi mei kore ngā mahi wawao a ngā rangatira ā-iwi.

Ki tā Mahuta, “Kua mōhio pai a Talleys kua whānui a mātou rawa, ngā rawa o te iwi Māori, arā ki ngā wāhi hī ika, ngā wāhi patu mīti aua wāhi katoa, nōreira me aro atu a rātou whakaaro ki ngā kaipatu mīti.”

Hei tā Tau, “Māmā noaiho te kōrero ki a rātou engari e tatari ana mātou kia tae mai te reo o a tātou kaimahi ki roto i ēnei wheketere.”

Heoi, ahakoa tēnā toronga o te ringa āwhina, he māharahara tonu to Raniera Tau.

E ai ki a Tau, “E tūpato ana mātou ki ēnei momo mahi i te mea taihoa ake ka titiro e ngā uniana katoa me ngā kaiwhakahaere pākihi katoa ki a mātou hei whakatatu i o rātou raruraru ki waenganui i a rātou anō.”

E haere tonu ana ngā whiriwhiri i waenga i te uniana kaipatu miti me Talleys, hei te toru wiki pea tū ai tā rātou hui.