Kaupapa: Entertainment

Ka parea e TVNZ ā rātau hōtaka Māori, Pasifika hoki ki rahaki

Mere McLean

Kua huraina, Te Reo Tātaki ō Aotearoa i ō rātou wawata mo te hanganga ō a rātou hōtaka Māori me ngā iwi nō ngā moutere.

 Atu i te tau hōu ko Te Karere noa iho ka noho ki raro i te whakaruruhau ka noho mai kō ngā kamupene waihanga kiriata ō waho hei hiki i ngā hōtaka.

He hekenga roimata i te rangi ki runga i te reo tātaki o Aotearoa, hei tohu i te panonitanga ka rere.

Kua rongo te wāhanga hōtaka Māori, Pasifika ka katia ō rātou tatau.  Tata ki te toru tekau ngā tūnga mahi ka noho hei papa.  

Kīhai tētahi mai i te Reo Tātaki ō Aotearoa i whai wā ki te whakaputa kōrero mā runga kāmera, engari ki runga i te whārangi pukamata o Te Karere e mea ana:

"E whakatakariri ana ngā kaimahi nā te whakamutunga ō tēnei tūmahi ki roto ō te Reo Tātaki ō Aotearoa.  Ka mahi tonu ngā kaimahi ki runga i ngā hotaka kia puta ai ngā whakaritenga hōu."

Ka haere tonu a Te Karere ka noho rātou ki raro i ngā whakahaere o te Reo Tātaki, heoi mō ngā hotaka pēnei i Te Waka Huia, Marae me Tangata Pasifika kua tō pea te rā ki a rātou.