Kaupapa: Indigenous

Ka noho titikaha te iwi o Tuhoe ki te ngākau o te Minita Ture ki Kānata

Ka noho titikaha te iwi o Tūhoe  ki te ngākau o te wahine iwi taketake tuatahi kua eke hei Minita Ture ki Kānata, hei Rōia Matua anō hoki.

I tau a Jody Wilson-Raybould ki roto tonu i te manawarū o te iwi, ki Taneatua. 

Ko ia te upoko o te ture ki Kaanata, kua tau ki Tuhoe ki te rapu i te tika me te pono

Ki tā Wilson-Raybould i te hiahia ia ki te whai māramatanga i ngā uri o te kohu, kia rongo ai i ngā piki me ngā heke o te mahi tahi me te Karauna.

E ai ki a Tamati Kruger, “Kei reira ōna uauatanga. Kei reira ano ōna whakararu.”

Hei tā Tame Iti o Te Komiti o Runga o Tuhoe, “Kua kore mātou e titiro ki ngā whakaaro o waho atu a mātou, a, kia noho pumau tonu i roto i te rohe.  Kei reira te oranga mō matou, kaore ki waho.”

He ara kua whā tau e parahia nei e Tuhoe mai i te whakataunga o tōna kereeme. Koira i arahina mai ai a Minita Jody Wilson-Raybould e tana Minita taurite i konei, e Chris Finlayson, ki Tuhoe.

E ai ki a Chris Finlayson, “Because it’s such an important settlement in the life of the country, and because of the innovative approach in the life of Te Urewera, which has actually got a lot of interest overseas.”

Hei tā Tamati Kruger, “Koira tana patai he aha i taea ai te ture Pakeha me te tikanga Māori te mahi tahi? Ana kei te hiahia a ia ki te ako tahi me āna minita, me āna āpiha i peheatia e tātou i te mea he tuatahi tēnā i te ao.”

Heoi ko te matū o tenei haerenga he aro ki ngā take ture o Aotearoa. I tēnei wā tonu e arotakehia ana e Minita Wilson-Raybould te pūnaha ture o Kaanata, e mātotoru nei te noho o ngā iwi taketake o reira.

E ai ki a Jody Wilson-Raybould, “All of our public mandate letters say that the most important relationship to our govt and to Canada is the one with indigenous peoples and how we’re going to move forward as a country is to ensure that we create a space for indigenous peoples to succeed.”

E rua noa iho ngā iwi Māori ka tūtakina e te Minita i tana haerenga kotahi wiki noa iho ki Aotearoa nei – ko Tuhoe me Ngai Tahu.

Hei te ahiahi tonu nei ratou ko tana tira rere ai ki Otautahi.