Ka huaki ano ngā tatau o Kuini Wikitoria mē Tipene ?

Kua whakatūria e te poari o Kuini Wikitoria me Hato Tipene he rōpu motuhake hei wānanga i te anga whakamua o te waka.

Ko tā tetahi o ngā mema o te poari he tauira ō mua hoki ko Joe Harawira ko te whāinga nui o te rōpu  ko te āta titiro mēna e tika ana kia whakatū ngā kura ano.

Ko tā te Pihopa o Te Tai Tokerau ko Kito Pikaahu kua whakakotahi ai ētahi tauira ō mua ki te whakatinana i te kaupapa nā whai ano, he ōrite katoa tā rātou hiahia te whakatuwhera ano i ngā kura.

Kō atu i te tekau tau mai ano i te kapinga o ngā kura e rua nei, inaianei kua rite mai te poari o ngā kura ki te wānanga i tōna oranga.

Ko tā Harawira, i tenei wā kare i te tino mohio, he aha, me pehea hoki te hanga o te kura, me era atu ahuatanga ko te rōpu kua whakaritea kā āta tirohia ki aua take.

Nā Ngati Whatua, ngā whenua o Wikitoria, i tākoha atu ki te Hāhi Mihinare, a, hei tā te māngai o Ngāti Whatua ki Orakei ko Grant Hawke mena e kore e taea te whakatinana ano i ngā kura ki aua wāhi, ko te tikanga me whakahokia aua whenua ki te iwi.

Ko tā Pikaahu ki tera e ngana ana te hāhi me ngā tauria o mua ki te whakaora i ngā kura nei.

I tenei wā tonu, e kohikohi puehu ana ngā whare o Hato Tipene, he wāhi whakangungu ano hoki mo te ope taua. Mo te wāhi o Wikitoria kua rīhi atu aua whenua ki tētahi kura ako reo Pākeha.

Ko tā Harawira kua puta te karanga ki te katoa o ngā tauira ō mua o Wikitoria me Hato Tipene ki te tuku korero, ki te whai wāhi ki ngā mahi rangahau o tenei kaupapa.

I tenei wā, kei ngā ringaringa o te Kāhui Motuhake hou nei, te oranga o Wikitoria raua ko Tipene.