Kaupapa: Nelson Mandela

Ka haere a Harawira ki te tangihanga a Mandela i runga i tōna ake mana

Ko te taonga haeretahi me te Kaiārahi o Mana ki te whenua taurikura o te matua o Awherika ki te Tonga o mohoa nei o Nelson Mandela, ko te haki tino rangatiratanga.

Hei tā te mema pāremata mō te Tai Tokerau, kaiārahi ō-mua hoki mō te rōpū porotēhi o Patu, i whai wāhi atu ki te porotēhi kia aukati i te haerenga whutupōro a te kapa Springbok i te tau waru tekau mā tahi.

He haerenga tēnei kia kawe atu i ngā parekawakawa o te iwi Māori, o te hunga porotēhi hoki i whawhai mō te mana o ngā uri mangumangu o Awherika ki te Tonga.

Ka noho tonu mai te kaiārahi o te porotēhi mō te haerenga Springbok, a John Minto, ki te wā kāinga, ā hei te rā o te nehunga o Mandela, hei te Rātapu nei, ka whakahaeretia e ia he rā whakamahara mō te hautupua, mō Madiba, ki ngā whenua, i puta ai te hunga porotēhi, ki te aukati i te kēmu whutupōro a te kapa Springbok ki Kirikiriroa.

Ka whakarauika ake ngā mana nui o te ao, rātou ko te tira haere o John Key ki Soweto nei āpōpō, ki te hui whakanui i a Mandela.

Otira hei tā Harawira, ehara i te mea i pōhiritia ōkawatia a ia, engari ka whai tonu atu ia i te ara haere o te taonga o mate, tae noa atu ki tōna okiokinga whakamutunga ki Kunu.