Ka arotakehia ngā ture nehu, tahu tūpāpaku e Te Aka Matua o Te Ture

Aroha Treacher

E arotake ana Te Aka Matua o Te Ture i ngā ture nehu, tahu tūpāpaku hoki mō te wā tuatahi i roto i ngā tau rima tekau.

E whai ana tēnei i ngā tautohetohe mō ngā tikanga me te ture i pupū ake mō te okiokinga o James Takamore, me te pātai, mēna kei tōna iwi o Tūhoe, kei tōna hoa rānei i noho taki ki a ia i Ōtautahi mō ngā tau rua tekau, te whakatau whakamutunga.

I te tau rua mano mā whitu, nā te whānau o James Takamore tōna tūpāpaku i kahaki ake i Ōtautahi kia whakahokia atu ki te Moana a Toi.

Nā kona, i tiro Te Aka Matua o Te Ture kia pēhea rongoā ai ngā raruraru.

He tirohanga nui whakaharahara tēnei i roto i ngā tau rima tekau, heoi, ka taea pea ngā urupa te whakatū ki ngā whenua tūmatawhāiti puta noa i te motu.

He ono mano, rima rau te utu mō te nuinga o ngā tangihanga, heoi he taumaha nui mā ngā whānau pani.

Ko te hiahia, kia whiwhi raihana ngā kaimahi tūpāpaku.  Ki te pērā, ka pēhi tonu ngā nama ki ngā whānau pani.

Tūturu, kei te ruarua haere ngā whenua urupa, nā reira, kāore ētahi hunga kua whetūrangitia i te whakaaetia ki roto, he whakatau taumaha mō te marae.

Heoi ki te urupa o Te Pakiaka ki Whakatū, he tokotoru ka taea ki roto i te rua kotahi.

Ka whakatūria e Te Aka Matua o Te Ture he wānanga ki ngā pito maha o te motu i tēnei marama, hei akiaki i te tuku tono mō tēnei take, heoi hei te rua tekau o tērā marama ka pau te wāhi tuku tono.